UNO sum Dollar Maktaduai 69 vel hmanga Mizoram kuthnathawktuten eizawnna nghet an neih theihna tura hmalakna kalpui mek FOCUS chungchang zirchianna leh tlangzarahna  "District Level Consultation Meeting on FOCUS" chu District huapin Champhai Venglai Community Hall-ah neih a ni a.  He hun hi Champhai District a MLA 2, Dr ZR Thiamsanga, MLA Champhai North leh Pu L.Thangmawia, MLA Lengteng  ten an hmanpui bakah mithiamten he hun hmangtu Champhai District chhung khawtin VC te hnenah FOCUS hrilhfiahna leh zirtirna an nei.

He hun Champhai Bawrhsap Dr. Naveen Aggarwal-a kaihhruaiah hian Khuallian  Dr. ZR. Thiamsanga chuan Mizoram kuthnathawktute chawikanna tura FOCUS kalpui mek chu Mizoram Sorkar Flagship Programme SEDP nena inchawih tak leh kalkawp tur anih vangin taimakna leh tumruhna nena kan tankawp chuan kan hlawhtlinpui ngei dawn a ni, a ti a.  Mizoram dinchhuahna tura UNO sum Mizoram in a hmang ve thei ta chu lawmawm a tih thu leh FOCUS chu kaihhruaina mumal tak hmanga kalpui anih  dawn vangin kan ramin a dinchhuahpui ngei a beisei thu a sawi.

He huna Khualzahawm Lengteng Bialtu MLA   Pu L. Thangmawia pawhin thu sawiin,  kan ramin Kuthnathawktute dinchhuahna tur  ruahhmanna tha tak tak a lo kalpui thin chungin,  chung ruahmannate chu a tak taka kalpuina kawngah viltu leh enkawlna   a that tawk thin loh avangin a hlamzuih fo thin a.  Tuna FOCUS kalpui tur hi a tir atangin ruhrel fel taka din anih vang leh hnathawktu pawh Champhai District tan bik mithiam 72 ten awmhmun an benbel nghal avangin hlawhtling tura beiseina sang tak a neih thu a sawi bawk.

FOCUS bika State Project Director & CEO Pu RK. Nithanga chuan FOCUS kalphung tlangpui tarlanna neiin,  he hmalakna hi Mizoram a District 4; Champhai, Mamit, Kolosib leh Serchhip-ah kalpui hmasak anih dawn thu leh Thingtlang loneih tih hmasawnna turin Agriculture & Allied Sector; Agriculture, Horticulture,  AH & Vety,  Soil & Water Conservation, Forest leh Fisheries Department kaltlangin eizawnna hrang hranga kuthnathawktute tihhmasawn leh an thlai thar chhuah dehralna dapsak thleng a huamtel thu a sawi.

Chawhnu lamah Pu George Lalthanngura, DAO/DPM Champhai District kaihhruainain line department hang hrang atanga mithiamten VC leh Staff te hnenah zirtirna an pe a, zawhna leh chhanna  hunte hman a niin hun hlawkthlak tak hman a ni.