Vawiin khan Champhai District Level Coordination Committee chu Champhai DC Pu Zoengsanga hovin DC Conference Hall-ah an thukhawm. He hunah hian District Office hrang hrang hotute’n an department chan theuhte hnathawh leh hmalak dante bakah hmathlir te an sawiho a ni.

DC Pu Zoengsanga chuan district tana inpawhtlang taka thawhhona tha tak department tin ten an neih theih a beisei thu a sawi a. Kalphung pangngaia kal bek bek a tawk tawhlo a ni tiin, district tih hmasawn nana an hmalak theihna zawn theuhvah ngaihtuahna leh tha seng turin kalkhawmte chu a sawm a. Champhai district-in ei leh bar lama hmasawn theihna tur a neih that thu Pu Zoengsanga chuan sawi langin, agriculture leh horticulture-te, border trade leh tourism-ah ringawt pawh hlawkna tham a awm thu leh, Mizoram pum tihhmasawnna kawnga an thawh theih thu a sawi a ni.

Vawiin meeting-ah hian department hrang hrang ten kumin sorkar kum (2014-2015) chhunga an hna thawhte leh an hmabak la neihte report an pe a, harsatna an tawhte pawh an sawiho a ni. Town planning chungchang te, district chhunga kawng siam chungchangte, sanitation chungchangte, bazaar chungchang leh thil pawimawh dangte meeting-ah hian sawiho a ni.