Vawiin khan MZP Hqrs, Lunglei buatsaihin Lunglei khawpui chhunga High School leh Higher Secondary School hrang hrang atanga zirlai thlankhawmte tan YMA Conference Hall, Venglai-ah 'Students Motivation Programme' neih a ni a, Addl DC Lunglei Pu H.Dolianbuaia-in he hun hi a hmanpui a ni.

Students Motivation Programme MZP Hqrs Lunglei Vice-President Lalrammuanawma kaihhruaiah Addl DC Pu H.Dolianbuaia chu Resource Person a nihna angin 'Experience Sharing & Challenges' thupui hmangin zirlaite fuihna hun a hmang a ni. MZP Hqrs Lunglei President Benjamin Vanlalfela chuan an pawl hmalakna hrang hrangte tarlangin zirlaite fuihna hun ' Students Motivation' hi kum 2012 atanga hman tan niin zirlaite zingah hmasawnna duhawm tak hmuh chhoh zel a nih chu lawmawm a tih thu a sawi bawk a ni.

Vawiina zirlaite tana hun hmanah hian Resource Persons dang 2 - DIPRO Lunglei Pi Mina Zoliani-in 'Career Guidance' thupui hmangin thu a sawi a, Baptist HSS Serkawn Principal Pu C.Lalhmingmuana'n 'Examination Pattern' chungchang a sawi bawk a ni.