Vawiin chawhma dar 10:30 AM khan Laila Hall, Saiha-ah “Seminar on Anti-Tobacco” hun hmang. He seminar ah hian Pi Lal Riliani, President, Indian Society on Tobacco & Health (Mizoram Chapter) chu khuallian niin Pu Alok Swarup, IAS, Saiha District Bawrhsap leh Pu R.T. Zachono, CEM, MADC te chu khualzahawm an ni.

He seminar ah hian Pi Lal Riliani chuan thusawiin, ram hi a chhunga mi chengte an hrisel phawt loh chuan a changkangin hma a sawn thei ngai lova. Mizoram ti changkang a ; ti hmasawn tur chuan a chhunga chengte kan hrisel phawt a ngai a. Mizoram ti hriselna tur chuan hriselna hmelma lian ber zuk leh hmuam hi kan bansan a ngai a ni a ti. Zuk leh hmuam ti mi reng reng an hrisel lo va, an zawmthaw in, faina an ngaina lova, an rimte a chhia a, mahse an rim a chhia a ni tih an in hre thin lo a ni a ti bawk.

Mizoram Chapter ISTH (Indian Society on Tobacco & Health) President Pi Lal Riliani chuan zuk leh hmuam dona kawngah hian mitin mahni inhneh hmasa phawt ila, mi dangte tan Role Model kan ni thei ang a ti. Nu leh pa ten an fate tan Role Model ni tum se, Zirtirtute ten an zirlaite tan, Head of Office ten an staff te tan, nula leh tlangval ten an aia naupang zawkte tan ; tichuan kan awmna theuh a Role Model kan nih theih chuan Mizoram hi state hmasawn leh changkang, IMR (Infant Mortality Rate) leh MMR (Mother Mortality Rate) hniamna leh cancer vei tlemna state-ah kan siam thei a ni, a ti.

He seminar hi session hnih thenin, session khatna chu Pu John L.T. Sanga, Addl. DC in a kaihruai a. Session khatna hi khuallian leh khualzahawm te thusawi ngaihthlakna hun te, zaipawl leh mimal zai ngaihthlakna hun leh Mizoram Amateur Taekwonda Association (MATA) te Special Item thlirna hun ah te hman a ni.

Session hnihna erawh chuan Technical session niin, Z.T. Vawra Hmar, District Co-Ordinator, South Mizoram in power point presentation a pe a. Power Point Presentation hun hman zawhah hian mipui kalkhawmte nen huangzau taka Copta dan leh hrai chungchangte huangzau taka sawihona leh inhrilhfiahna hun hman a ni.