Vawiin chawhma dar 11 khan Champhai District Fire Prevention Committee chu an Chairman leh District Bawrhsap ni bawk Dr Naveen Aggarwal, IAS hovin an thukhawm a, February thla chhunga Fire Prevention Week 2019 hman dan tur leh kumin thal chhova District chhunga ram kang a awm loh nana hmalak dan tur hrang hrangte  rel a ni a. Fire Prevention Week hman hun tur chungchangah State Level Committee on Fire Prevention thutlukna ngaihchan rih  a ni.

Chairman Dr Naveen Aggarwal chuan kangmei ven kawngah theihtawp chhuah a tul thu leh District mipuite chu kangmei tichhuaklo tura fimkhur turin a chah a. Mipuite hnenah a zau thei ang bera kangmei ven dan leh tul dangte hrilhhre tur chuan media chhawr tangkaia, mipui nawlpui thlengpha Public Awareness Campaign neih angai a ni, a ti a. Champhai District mipuite kangmei  chhuak thei laka fimkhur theuh turin a chah a ni. 

Vawiin meeting-ah hian Fire Prevention Week chu District level-ah urhsun taka hman nise, kangmei laka fimkhur tura zirtirna khawlaiah a zau thei ang bera auchhuahpui nise tih a ni a. Zirlai naupangte hnenah kangmei ven kawnga zirtirna neih tha tih niin, Village Fire Prevention Committee   hmalaknain mei lam sial endikna leh kangmei ven kawnga hmalak zel nise tih a ni a. YMA Information Centre leh VC aurinna hmangte a kangmei hluar  hun laiin mipuite zirtirna lam hawia thuchhuah siam thin nise ti a rel a ni a. Khawtinah kangmei ven kawnga inzirtirna Awareness Campaign neih nise, Forest Department, Police leh YMA tangkawpin Mobile Checking neih thin nise tih a ni bawk a. Nodal Department Environment and Forest and Climate Change kaihhruaina hnuaiah YMA leh VC te tangkawpin  kangmei ven kawnga inzirtirna leh hnatlangte neih nise tih a ni a. Huan, Leipui leh Lo hal tur ten sawrkarin dan a siam zulzuiin mei kawng sial theuh nise, Lo hal hun chhunga hal hman vek tura hriattir nise tih a  ni bawk.

Heng bakah hian meeting chuan District Magistrate hnen atangin VC tinte hnenah kangmei  ven kawnga tihtur leh zawm turte khauh taka hriattirna pek nise, dan pawisa lo chungah na taka hremna lek kawh ngei nise ti a rel thluk a ni a. Heng bakah hian kangmei ven kawnga mitinte hriat tur Lehkha ziak chu  Chanchinbu phekah leh TV katlanga puan nise, remchan dan anga Live Talkshow te pawh buatsaih nise tih a ni a. Kang mei ven kawnga mipuite zirtirna kawnga thawhhlawk Daily Newspaper hnenah lawmman pek nise tih a ni bawk.

He meeting ah hian Pu C. Lalbiaka, DFO Champhai, Member Secretary, Champhai District Fire Prevention Committee chuan Meeting Agenda note siamte sawizauna  neiin, ram kang awmtheihna te chu mei lam sial that loh vangte, Sa pel mi ten sa khalh chhuah nana ram an hal thin vangte, Ran tlatna tur tha duh vanga ram halte, Zin mite fimkhur loh vanga kawng kam kang leh Kuthlei thiltih vanga  kangmei chhuakte   a ni, a ti a. Kangmei ven kawnga tan lak thar leh a tul thu a sawi bawk a ni.  

Vawiin meeting-ah hian District Level Committee on Fire Prevention member-te an tel a ni.