Civil Hospital Medical Superintendent Dr. KL Remsanga kaihhruai Free Health Clinic kharnana inkhawmah hian Health Minister Dr.R Lalthangliana chuan Aizawl Civil Hospital bakah sawrkar damdawiin hrang hrang te tihchangtlun a tul zia a sawi a, khawl chauh ni lovin, a thawk tur mihring thlenga mamawh belhna a nasat thu a sawi a ni. Mizorama Medical College awmchhun MIMER chungchang sawiin Health Minister chuan Society anga kalpui a tha ber em tih zirchian a tul a, tunah hian 'transitional period' ah an awm a ni a ti a, hemi chungchang zirchiang tur Committee din turin chak taka hma lak a ni a ti.
Mminister chuan Medical College tha tak Mizoram in kan neih zel dan turah hian Sawrkarin hma uluk takin, fim taka ngaihtuahna nen kan la chhunzawm dawn a ti a ni. Health Care Scheme changtlung zawk, Zoram mipuiten awlsam leh zuala a hamthatna an chhawr theihna tur ngaihtuaha ennawn a nih tur thu a sawi bawk ani. Health Minister hian Dr KL Remsanga, Medical Superintendent ziah lehkhabu " Development of Eye Care Services in Mizoram" tih a tlangzarh nghal bawk a ni.
Dr. John Zohmingthanga, Dy Medl.Supt chuan report tawi pein MJA te nena thawhhona tha tak an neih avanga he programme hi nei thei an nih thu a sawi a, kumin ah hian mi 78 in free check up an nei a ni. MJA President Pu Zonunsanga Khiangte pawhin thusawiin Civil Hospital thawktute leh Health Minister chungah lawmthu a sawi a, Aizawl Civil Hospital chungchang tarlanna "The Progress and Present Status of Civil Hospital Aizawl Mizoram" tih lehkhabu a tlangzarh nghal bawk a ni.
Mizoram Journalist Association member te puala neih Free Health Clinic kharna ah hian Aizawl DC leh RKS ( Rogi Kalyan Samiti) Governing Body Chairman ni bawk Dr A Muthamma chuan Health Minister hnenah hian Aizawl Civil Hospital in an hman tur Emergency Ambulance a hlan nghal a, hei hi RKS pawisa tling khawm atanga cheng nuai 4.8 senga lei a ni.
Attachment
- Loading attachment...
