882/2023-2024

Champhai, the 22nd June, 2023: District Level Narco Coordination Centre (NCORD) Committee, Champhai District thutkhawm vawi 9-na leh kumin atana thutkhawm vawi 5-na chu vawiin chawhma dar 11 khan an Chairperson Pu James Lalrinchhana, District Bawrhsap hovin DC Conference Hall-ah neih a ni.

District Bawrhsap Pu James Lalrinchhana chuan ruihhlo do kawnga hmalatu NCORD thutkhawm chu hmalaknate inhriatpawhtawn leh infinchhuahtawn nan te, line department hrang hrangte inkarah thawhhona tha zawk siam a nih theih nantea pawimawh tak a ni, a ti a. Ruihhlo do chu tawpsan mai theih loh leh tanrual ngai tak a nih thu sawiin, ruihhlo tawlh, lei leh zawrh dap chhuah mai piah lamah ruihhlo leh a kaihhnawih chungchang inzirtirna Police, Excise & Narcotics, Assam Rifles leh adangte'n thahnemngai taka an kalpui chu fakawm a tih thu a sawi a. Ruihhlo do kawngah Line Department hrang hrangte, NGO, NCORD, NMBA leh District Level Task Force on Ruihhlo Do te tha thlah lova tanrual zel a pawimawh thu a sawi bawk.

Vawiin thutkhawmah hian meeting hmasa April ni 28, 2023 a neih thurel bawhzui dan tlangpuite NCORD Convener Pu Lalrinpuia Varte, SP Champhai hnen atangin ngaihthlak a ni a. Ruihhlo ngaite enhrang mai lova enkawlzui leh chhawmdawl kawngah theihtawp chhuah tlan a pawimawh thu sawiin, an hriselna dinhmun thlenga ngaihven a tul thu a sawi a. Ruihhlo leh a kaihhnawih do kawngah inzirtirna uar zawka kalpui a tul thu a tarlang bawk.

He hunah hian Champhai District Police leh Excise & Narcotics Department Champhaite hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpuite Addl. SP Pu Lalmalsawma Hnamte leh Asst. Commissioner of Excise & Narcotics Pu Vanlalvura Ralte te hnen atanga ngaihthlak a ni. Heng bakah hian Maj Asha Ram, Assam Rifles OC Champhai, Pi C.Ramdinmawii, Asst. Director, Food & Drugs, CMO Office Champhai leh Pu T.Lalnunsanga, Vice President, Sub-Hqrs. YMA Champhaite hnen atangin report ngaihthlak a ni bawk.

He huna tarlan a nih dan chuan NCORD meeting hnuhnung ber April ni 28, 2023 atanga nimin June ni 21, 2023 thleng khan Champhai District Police te'n ND&PS Act, 1985 hnuaiah case 14 an ziaklut a, hemi kaihhnawihah hian mi 19 man niin heng zinga 3 te hi ramdang mi an ni. Heroin gram 5506.7 (kg 5.51) man niin, Department lam chhut danin tualchhung market-a a hlut zawng Rs. 13,72,68,000/- a ni.

Hemi hun chhung vek hian Excise & Narcotics Department Champhai te'n ND&PS Act, 1985 hnuaiah case 12 ziaklutin hemi kaihhnawihah hian mi 24 an man a, ramdang mi an tel lo a ni. Heroin gram 627, Department lam chhut dana tualchhung rate-a Rs 7,52,580/- man, Alprazolam gram 628, Rs 5,700/- man bawr vel leh ruihhlo phurhna lirthei 6 (LMV 3 leh Two Wheeler 3) an man tel bawk. Heng bakah hian hemi hun chhung vek hian Assam Rifles COB Champhaiin heroin gram 600 bawr vel an man a, hemi kaihhnawihah hian case 1 ziaklutin mi 2 an man a. FDA, CMO Office Champhaiin inkaihhruaina dan zawm lova lakluh leh kawl Codryl-T Cough Syrup 100 ml, bur 200 an man bawk.

Thutkhawma tarlan anih danin Line Department hrang hrangte kaltlangin Anti Drugs Awareness Campaign, School, Kohhran leh YMA Branch-ahte tum engemawzat neih a ni a. Road Show, Intiamkamna, Slogan inziahsiak, Signature campaign, Powerpoint presentation hmanga inhrilhhriatnate neih niin, Champhai khawpui chhung mai bakah thingtlang khaw hrang hrangte tlawha inzirtirna kalpui thin a ni. Zonal Director, NCB Guwahati atanga lehkha hmuh, District Level NCORD Committee thutkhawma NCB aiawh member an tel ve theihna tura ruahmanna siam tura ngenna lut chu ngaihtuahho a ni bawk a; NCORD Committee member an nihna angin meeting an chhim theihna tur ruahmanna siam ni se an ti a ni.

NCORD hi kum 2016 ah din niin, kum 2019 ah khan siam that niin tunhnaiah chak lehzuala hmalak a ni a. May ni 10, 2022 ah District Level NCORD Committee member-te State Sawrkarin a siam fel a; hmalaknate Narcotics Control Bureau (NCB) lamah report zel thin a ni.