881/2023-2024

Aizawl, the 22nd June 2023 : Vawiin khan Extention of Chawnpui Sports Centre sakna tur lungphum phumna chu Chawnpui Sports Centre-ah neih a ni a, Deputy Chief Minister Pu Tawnluia chu khuallian niin lungpumna hi a nei a, Aizawl West I Bialtu Pu Zothantluanga chu khualzahawm a ni.

Khuallian Pu Tawnluia chuan sawrkarin thalaite rualawt a an awm a hlau hle a, kawng hrang hrangah hmasawnna an neih theih nan hmanrua chhawpchhuah sak chu a tum ber a ni a, vawiin ah hian UD&PA Department kaltlangin Chawnpui Sports Centre tih changtlung zel nana extension sak a ni tur hi Chawnpui veng leh a chhehvel mai nilo, Mizoram thalai ten an hmang tangkai zel dawn a ni, a ti a, Chawnpui veng mipuite chu a enkawlna leh tuaihnum zelna kawngah neitu chan chang a, rilru zau tak pu a sawrkar thahnemngaihpui turin a ngen a ni.

Khualzahawm Pu Zothantluanga chuan thu sawiin, Chawnpui Sports Centre Extension lungphumna neih ani ta chu hmasawnna leh changkanna rahbi thar, Aizawl khawpui cheitu tur ruhrel pawimawh bakah thalaite taksa hriselna leh rilru hmasawnna thlen tu a ni dawn a ni a ti a. Chawnpui Sports Centre Extension chuan Aizawl veng hrang hrangte tan mai ni lovin, Mizoram khaw hrang hrangte tan pawh a infiamna hmun pawimawh leh tangkai tak a nih a beisei thu a sawi bawkin project hnathawh tluang taka neih a nih theihnan a hnathawktute duhsakna a hlan nghal a ni.

He hunah vek hian Saitual leh Hnahthial District a hmantur Garbage Truck pahnih Deputy Chief Minister hian a vailiam bawk a ni.

AMC Corporator Pi Chuauzikpuii chuan Deputy CM leh bialtu MLA te hi a tawiawm a ni.

Pu Lalmalsawma Pachuau, Secretary chuan he hun hi a kaihruai a, Pu Andrew Lalhruaia, Joint Director hnen atangin Technical Report ngaihthlak a ni a, Pu VL Dohranga, Local Council Chairman, Chawnpui hnen atangin thusawi tawi ngaihthlak a ni bawk a. He hun hi Pu H.Lianzela, Director UD&PA chuan lawmthu sawiin he hun hi a khar a ni.

Extension of Chawnpui Sports Centre ah hian Basement III, Basement II leh Basement I bakah Groundfloor leh 1st Floor a awm dawn a. Ministry of Finance hnuaia Special Assistance to States for Capital Expenditure (SASCE) atanga sum hmuh, cheng nuai zathum a thawh tur a ni a; Zothan Consultancy Services, Luangmual in he hna hi an thawk dawn a, ruahman dan chuan thla sawmpahnih chhunga sak zawh tur a ni.