880/2023-2024

Aizawl the 21st June 2023: Mizoram Legislative Assembly chuan kum 50 an tlin (Golden Jubilee) lawmna kharna chu vawiin khan Assembly Conference Hall, Annexe building-ah an hmang a. He hunah hian Speaker Pu Lalrinliana Sailo bakah Deputy Chief Minister Pu Tawnluia, Minister-te, MLA-te leh Former Legislators’ Association of Mizoram (FLAM) member-te an tel a ni.

Kumkhat chhung awh MLA Golden Jubilee kharna inkhawmah hian Deputy Chief Minister Pu Tawnluia chuan ram hruaitu hmasaten bul an lo tan tawhna chu fakin, an kawng tuaihnum sa vawng nung zel tur leh an thawhrimnate chu hre reng turin vawiina roreltu (legislator) te chu a chah a. Pu Tawnluia chuan Mizoram Legislative Assembly chu zahawm leh entawntlak taka rorelna hmun leh sawihona hmun ni fo thin a ni a ti a. State dangte nen khaikhinin a felfaiin boruak a tha thin hle a, anmahni thlang tlingtute zahawmna an hum hle a ni tiin lawmawm a tih thu a sawi a, chhawm nung zel turin a chah bawk a ni. Mipuite pawhin rorel tura an thlantlinte chu dik tak leh rinawm taka hna an thawh theih nan thawhpui thiam turin a ngen a, vawiina Assembly nihphung leh state dangte laka Mizoram tihmingthatu Member-te inthunun theihna leh dawhtheihna chu chhawm nun zel a nih theih nan duhsakna a hlan.

Deputy Speaker Pu H Biakzauva pawhin thu sawiin Mizoram UT leh State a nih chhoh dan a tarlang a; hnam anga inlungrualna leh inpumkhatna a pian theihna tur leh inenkawlna hranpa neih theih nana hmalatute an fakawm hle a ni, a ti a. Ram hruaitu hmasate leh tuna ram roreltute chu ram hmasawnna leh hnam inpumkhat nana nasa taka thawk tute vek an ni, a ti. Tun dinhmunah Mizoram chhungah ram buai avanga rawn lut bakah state pawn atangin Zohnahthlak tam tak an awm tih tarlangin, lainatna leh hmangaihna nena lo dawnsawnnaah malsawmna a awm ngei ang a ti bawk. Ram leh hnam tan chakna leh theihna neih ang angte hmang thiam turin leh a eng zawnga hmathlir nen Mizoram kalpui tura inbuatsaih a tul a ni a ti bawk.

Minister Dr. R. Lalthangliana pawhin thu sawiin, an hun chhung ngeia ‘Golden Jubilee’ lawm a ni chu a vanneihthlak hle a ni, a ti a. Speaker tam tak a lo hrawn tawhte chu sawiselna tur a hriat loh thu sawiin, zahawm taka House an lo kalpui thinnaah zahna chibai a buk a ni. Mizoram Legislative Assembly kalphung mawi tak chu chhawm nun zel a nih theih nan duhsakna a hlan nghal bawk.

FLAM President Pu Liansuama pawhin Mizoram sawrkarin MLA lo ni tawhte duhsak taka a tuamhlawm thinnaah lawmthu a sawi a. Tun dinhmunah Ex-MLA mi 59 an awm thu leh member boral tawh nupuite chu Associate Member-a an lakluh thin thu a tarlang a, an vaiin member 154 an awm mek thu a sawi. Legislative Assembly election lo awm tura an campaign-naah pawh felfai taka kalpui theuh turin a fuih a. Mizoram hmel timawitu ni zel tur leh ze tha, changkang leh thianghlim neitu ni theuh turin kalkhawmte a chah a ni.

Mizoram Legislative Assembly kum 50 tlin lawmna hun kharnaah hian Mizoram Speaker Pu Lalrinliana Sailo chuan lawmthu sawiin, hun tha leh duhawm tluang taka an thleng thei ta chu lawmawm a tih thu a sawi a. Speaker chuan MLA lo ni tawh e leh ni mekte thawhhona a tha hle a ni tiin Assembly Secretariat-a thawktu zawng zawngte inpeknaah lawmthu a sawi bawk. Mizoram politics chu Mizo Mizona leh Kristianna in a kaihhruai thin thu tarlangin tawngkam pawh an uluk tlang hle thin a ni a ti a. National Legislators' Conference, Mumbai-a neih zawh takah Mizoram MLA-ten House zahawmna an kenkawh dan te, Mizoram Legislative Assembly chuan Session full proceeding live telecast ti hmasa ber a nih thu te leh paperless (e-vidhan) ah India rama 2-na a nih thu te sawilan a nih thu tarlan a ni a, thil chhinchhiahtlak leh chhuanawm tak a ni, a ti. Ram hruaitute tiphur a, chakna petu ber chu ram hmasawnna tluantling leh sakhaw ngelnghet neih hi a ni tih a sawi a. Hruaitu hmasate leh dan siam tura thlan tlin MLA-te chhe lailet der leh thil tha tih reng reng nei lo anga sawi thin chu pawi a ti hle a, kum 1972 atanga vawiin thlenga MLA lo ni tawh zawng zawng chu mi 232 an nih thu tarlangin ram tana thawk tha leh sulhnu ropui tak tak neite vek an ni, a ti. Pu Lalrinliana Sailo chuan zirlaite tana hlawkna a nih beiseiin kumin atang chuan Assembly House chu zirlaite tlawh theiha hawn a nih tawh tur thu a tarlang a. Speaker hian vawiina sawm bikte hnenah ngaihhruina thilpek a hlan nghal a ni.

Vawiina MLA Golden Jubilee kharna hun hi Assembly Commissioner & Secretary Pu Lalhmahruaia Zote chuan a kaihhruai a. Pu C Remsanga, Legislative Assembly Superintendent chuan hunserh hmangin, Deputy Secretary Pu Lalthangmawia’n report a pe a ni.

Mizoram Legislative Assembly term khatna leh hmasa ber chu May ni 10 1972 khan neih tan a ni a, kum 50 a tlin lawmna pui ber chu 9-10 May, 2022 khan neih niin kum khat chhungin lawmdan leh intihhlimna chi hrang hrang neih a ni. Golden Jubilee lawmna pualin Organising Committee chu Speaker kaihhruaina hnuaiah 2021 khan din a ni a, Jubilee theme atan ‘Dikna, Inpumkhatna leh Hmasawnna’ tih chu hman a ni. Golden Jubilee pualin hriatrengna souvenir te, logo siam intihsiakna te, jubilee lungphum feet 13.5-a sang te, calendar leh decorative items hrang hrang buatsaih a ni.

Mizoram Legislative Assembly kum 50 tlin lawmna puala hun hmandan hrang hrang te chu:

1) March ni 11, 2022 khan DDK Aizawl Station-ah sawi hawnna hun hman a ni.

2) April ni 20 2022 khan local cable TV-ah thupui hrang hrang hmangin sawihona hun buatsaih a ni.

3) April ni 21 leh 22, 2022 khan college zirlaite tana Parliament lemchan intihsiakna (Youth Parliament) hawihawt a ni a, he intihsiaknaah hian a pumpuiah Govt. Aizawl College chu pakhatna niin, PUC pahnihna an ni a, Govt. Hrangbana College te chu pathumna an ni. Best Legislator atan Beirapatha Khaila (Hrangbana College) thlan a ni.

4) May ni 4 2022 khan Golden Jubilee pualin exhibition buatsaih a ni a, assembly kaihhnawih thil hlu tak tak te chu mipuite hmuhtheiha phochhuah tan a ni.

5) May ni 9 2022 khan a lawmna hun tak tak buatsaih niin seminar te neih ani a. Governor hovin cultural programme hman a ni.

6) May ni 10 2022 chu a champha phak tak tak lawmna ni hman niin special session neih a ni a, Assam Legislative Speaker chuan a lo telpui bawk a ni.

Legislators ten (ex MLA leh sitting MLA te) joint meeting neiin kalphung tha leh best practices te sawiho a ni.