Vawiin chhun dar 11 khan Champhai District Level NLUP Monitoring & Implementing Committee te chuan a vawi khatna atan Champhai DC Conference Hall-ah Chairman Pu TT Zothansanga, MLA hovin an thukhawm.

He meeting ah hian Champhai District chhunga NLUP Line Department hrang hrang ten NLUP a hma an lak dan report an pe. AH & Vety Department hnuaiah Trade 5 awmin beneficiaries 1962 an nei a. Agriculture department in trade 3 ah beneficiaries 917 an neiin Horticulture department in trade  4 ah beneficiaries 1366 an nei a. Sericulture department ah silk work rearing thlangtu mi 186 an awm a. Fisheries department hnuaiah sangha khawi thlangtu 147 leh E & F department hnuaiah mau chin thlantu 283 te an awm bawk. Industries Department ah trade 3 awmin beneficiaries 733 an awm a, Soil & Water Conservation department hnuaiah trade 2 awmin beneficiaries 367 an awm a ni.

E & F Department leh Sericulture department te hian 2nd Instalment an sem zo tawh a, a bak line department dangte hian 2nd Instalment sum hi sem chhuak turin hma an la mek tih tarlan a ni.

Champhai District chhungah hian Agriculture department hnuaia beneficiaries 19 te chu hna an thawh that loh avangin warning pek an ni a, Sericulture department a beneficiaries 13 te chu an hmalakna hmuh tur a awm loh avangin 2nd Instalment sum pek tawh loh tura tih a ni bawk. He tih lai hian Industries department hnuaia 1st Instalment sum la pek loh mi 247 te chungchang ngaihtuah a ni a. Aizawl khawpui chhunga AH & Vety trade thlangtu ten ran an vulh theih loh avangin Indsutries department ah hian an inlet deuh vek a, hei vanga khaihlak hi niin sum sem theih tura chak taka hmalak anih thu sawilan a ni.

Vawiin meeting ah hian Villege Level NLUP Monitoring Committee hmalak dan sawiho a ni a. Committee member te hi District Level NLUP Monitoring Committee ten an ruat hunah Block tinah an hmabak dan tur in hrilhhriatna neih nise an ti a. NLUP scheme hnuaia hma la tha lo te chunga action lak dan tur pawh Villege Level NLUP monitoring committee te report atanga ngaihtuah leh nise tih a ni a, hei bakah hian MGNREGS atanga NLUP link road siam anih dan te leh ram nei lote tana ram theh dan turte sawiho a ni bawk.

District Level NLUP Monitoring Committee hi thlakhatah vawi 1 an thukhawm thin dawn a, line department leh Villege Level NLUP Monitoring Committee report te an thlir ho thin dawn a ni.

Vawiina meeting ah hian Champhai District Level NLUP Monitoring & Implementing Committee member te an kal tha hle a ni.