Information and Public Relations Department, Government of Mizoram buatsaihin Champhai District MJA Member-te chuan nithum leh zan hnih thangin  Khawbung RD Block tlawhin Press Study Tour an nei. Press Tour hmang hian  Tlawva Small Hydel Project (Khuangthing-Thekpui), Dungtlang Police Station, Sub Hqtrs YMA Champhai Conference thlenna tur Pandal, Khuangthing Playground-a  sak mek   leh Khawbung RD Block huamchhunga Pipu sulhnu pawimawh tak takte tlawhin an zirchiang a ni.

Khuangthing leh Thekpui khaw inrina hmuna luang Tlawva lui tui la penga  siam mek Tlawva Small Hydel Project hi Kawlphetha Mega Watt 5 pe thei tur a ni a. Khawl pahnih 2.5 MW pe chhuak thei tur awmin, Sub Station pawh bunfel a ni a, turbine pahnih atanga 3.3 KV siam chhuah chu Generator pahnih hmanga 33 KV a tihlen hnua 33 KV Line, Kilometre 25 a thui hmanga Khawbunga thawhchhuah ani ang a, hemi atang hian hman theih turin  thawndarh leh tur a ni ang. Project hna hi Nortech Power Private Limited, Kolkata te thawh niin, Contracted Amount hi cheng nuai 5670 a ni a, approved  estimated amount chu cheng nuai 7340 a ni. He project atan hian NABARD atangin cheng nuai 5140.49, Ministry of New & Renewable Energy (MNRE) kaltlangin cheng nuai 700 atanga cheng nuai 630 hmuh tawh anih bakah State Matching Share atangin cheng nuai 1499.51 te hmuh tawh a ni.  

Ruahtui tlak tam lai May-October thla chhunga Kawlphetha 5000 KW (5 MW) pe chhuak thei tura ruahman a ni a. November- February thla inkar bikah 1000 KW pe tura ngaih niin, March-April chuan Sevicing tih tura ruahman a ni. Ruahman dan chuan kum khat chhungin Power 13.47 million unit siam chhuak thei tura ngaih niin, kum tin cheng vaibelchhe  491.66 hmu letin kum 15 chhungin a  siamna man hmuh chhuah beisei a ni a, Power siam chhuah hian Champhai District hnianghnar taka a chawm beisei a ni. 

He project hnuaiah hian Mizorama a vawikhatna turin project penhleh (Secondary unit) tenau deuh thal tui tlem laia khawl lian tinung zo chiah loh lai pawha kawlphetha siam chhuak thei tur cheng nuai 412.30 senga siam tum niin, Sawrkar laipuia Ministry of New & Renewable Energy chuan pawmpui tawhin tuna project kal lai mek hawn fel hnuah thawh ve nghal tura ruahman a ni.  Project tenau Secondary Unit  hi fur lai pawhin a kal ve reng dawn tho a, hetiang anih chuan Tlawva Small Hydel Project leh Secondary unit tangkawp hian fur tui tam laiin 5.500 MW / 5500 KW a pe chhuak thin dawn a ni. Secondary unit hian kum tin cheng nuai 61.77 a thawk chhuak thei tura chhut a ni a, a siam man hi kum 7 chhungin a rul ve thei dawn a, hetiang anih chuan Tlawva Small Hydel Project  pumpui senso chu kum 15 ni lovin kum 13 ah  kawlphetha hralhna atanga  rulh zawh  theih a ni ang.  

Tlawva Small Hydel Project khawl hnathawh enchhinna hmasa hmanga khawl tihnun chhinna Mechanical Rolling chu kumin January thla  khan hlawhtling taka neih a lo ni tawh a. Kumin fur tui tam deuh hunah Kawlphetha a pek chhuah theih dan enchhinna neih tawh tur niin, chumi hnuah chuan duhthusam ang anih chuan hman mai theih tura commission tum a ni.  

He hunah hian Er. R.Lalrinkima, Sr. EE, Project Construction Division, Khawbung chuan I&PR Department hmalakna kaltlanga Champhai District Member te'n project pilril tak Tlawva Small Hydel Project an rawn tlawh vang vang chu lawmawm a tih thu a sawi a. Hydel Project awmzia leh kalphungte sawifiahin  Mizoram Sawrkar chuan Contractor-te hnathawh dan uluk taka a vil  thu a sawi a. Thawhhona tha tak hnuaiah hnathawh anih thu sawiin, Project te tluang taka peihfel anih chuan Champhai District chuan  Kawlphetha hnianghnar takin a dawng thei dawn a ni, a ti bawk. Er. R. Lalrinkima bakah hian Er. Lalthasanga, SDO, Er. Vanlalmalsawma Pautu SDO leh thawktu dang ten Chanchinbumite hi lo dawngsawngin an hmalakna hrang hrangte chipchiar taka enpuiin an hrilhfiah sak a ni. 

Press Study Tour Team te hian February Ni 20 khan Dungtlang Police Station a hlankai thar tak tlawhin thawktute nen inkawmhona hun an hmang a bawk. Press Tour team te hi Pu HC Lalropuia, ASI leh a thawhpuite'n an lo dawngsawng a. Dungtlang Police Outpost tih thin hi 9.1.2020 khan Police Station puitlinga hlankai niin, 11.2.2020 khan hawn a ni. Dungtlang Police Station hian East Tuipui biala khaw 19 a vil mek a ni. 

Press Tour Team te chuan Tlawva Small Hydel Project, Dungtlang Police Station, Khawbung BDO, Khuangthing YMA  leh Pipu sulhnu hrang hrang tlawhna hmuna khaw mite  lo dawnsawnna leh  tawiawmnaah thinlung takin lawmthu an sawi a. Kawbung RD Block hnuaia khuate faina kawnga hmalakna chu  entawntlak an tih thu leh Pipu sulhnu pawimawh tak tak tlawhtute tana hriatrengna Souvenir te siam a zawrhchhuah nise tlawhtute tan a hlut mai bakah eizawnna tha tak anih theih an beisei thu an sawi a. Champhai district in kawlphetha hnianghnar taka aneih theihna tura Tlawva Small Hydel Project siam mek chu peihfel aniha district in a chhawr tangkai thuai an beisei thu an tarlang bawk. Sawrkarin Chanchinbumite tana Sawrkar hmalakna  project te zirchianna a siam chu hlawkpuiawm tiin zawngchhang tlak an tih thu an sawi a ni.  

Press Study Tour  February Ni 20-22 chhunga neih hi  Dr. Lallawmkima, DIPRO Champhai chuan kaihruaiin,  MJA lam hi Vice President Pu Lalhlupuia hovin an fehchhuak a ni.

a