Chief Minister Pu Zoramthanga chuan vawiin khan Chaltlang thlanmuala thlan chhawrdawh siam thar chu khuallian niin a hawng. He thlan chhawrdawh hi Mizorama vantlang thlanmuala a hmasa ber tur niin thlan 163 a awm a ni. 

Chief Minister chuan Chaltlang khawtlangin midangte tan pawh a entawntlak ngaihtuahchhuak a mitthi phumna tur ruahmanna thar buatsaiha an puitlin ta chu lawmawm a tih thu a sawi a. Mipui kan pung chho zel a, khawpui a cheng kan pung zel bawk a, mitthi kan pun belh zel bawk si a, ram a thang ve silo a, ruahtui tam bawk nen kan lei te a lo nghetlo in, thlanmual min te a tam phah hle a. Heng zawng zawng avang hian mitthi inphum dan kalphungah te ngaihtuahna thar kan neih a pawimawh reng a ni, a ti a. Mizo zingah chuan mitthi an awmin khawtlang kan intuamhlawm tha in, kan inngaihven nasa thin hle a. Chutichung chuan kawng hrang hrangah a hautak thin em avangin mitthi in vui danah te pawh ngaihtuahna thar hman tha a tih thu a sawi. 

He huna khualzahawm Chief Secretary Pu Lalnunmawia Chuaungo pawhin thu sawiin, mitthi phumna tura buaina a lo awm chhoh mek kara Chaltlang branch YMA hruaituten ngaihtuahna thar hmanga hmalakna thar an siam chu lawmawm a tih thu a sawi a. Ram chep zel tur ngaihtuah chunga ruahmanna thar leh tha tak an nei chu lawmawm a tih thu a sawi. 

Chaltlang thlan chhawrdawh hi Chaltlang YMA hmalakna in Urban Development & Poverty Alleviation Department hnuaia sum hmuh hmanga sak niin, 24.1.2019 khan a hmun laih tan niin, 26.10.2019 khan thlan chhawrdawh hi peihfel a ni a. Chhawng tinah thlan 27 dah niin, chhawng 5 a awm a. A vaiin thlan 135 a awm a ni. A chhak siam belhah thlan 28 a awm bawk a, a vaiin thlan 163 a awm a ni.

He thlan chhawrdawh hi a dung 80 ft. niin a vang hi 16 ft. a ni a. A hnuaia thlan siamna chin hi a dung 70ft. leh a vang 8 ft. a ni. A hnuaiah hian 3x3ft a zau leh thuk drain tur laih khuar a ni a, he khurah hian lei me chhungkhatin mitthi atanga tui lo chhuak lo hip kang thei tura ngaih a ni a. Thlan zawng zawng hi a mal malin pipe hmanga drain ah zawmluh vek a ni a, mitthi atanga tui lo chhuak te drain ah a luh vek theih nan slab hi a hnung lamah a awiha chhun vek a ni. Thlan chhawrdawh siamna tura estimated amount chu Rs. 29,73,000 a ni a. YMA chhiatni thatni fund atangin cheng nuai thum hman tel a ni bawk.  

Vawiin Chaltlang thlan chhawrdawh hawnna leh mipui hnena hlanna inkhawmah hian AMC Dy. Mayor Pu Lalringliana, CYMA President Pu Vanlalruata leh Chaltlang Local Council Chairman Pu R.C. Vanlalhlimchhana ten thu an sawi bawk a. Chaltlang Br. YMA President Pu Hnamhlunchhunga chuan kaihruaiin Work Supervisor Pu Lalhruaitluanga hnen atanga technical report ngaihthlak niin, Br. Secretary Pu K.C. Rosangzuala chuan lawmthu sawiin hun a khar a ni.

Chief Minister hian thlan chhawrdawh a hawn zawh hian Govt. Chaltlang Hr. Sec. School tlawhin a hmunhma a enfah nghal a ni.