Vawiin chawhnu khan P&E Veng YMA Hall, Serchhipah Poshan Abhiyaan hnuaia ICDS Mizoramin National Award alak lawmna hun hman a ni a, Dr. Lalzirmawia Chhangte, District Bawrhsap chuan khuallian niin a hman pui.

Khuallian chuan thusawiin, hetiang lawmman ropui kan dawng thei hi a lawmawm hle a, ram puma thawktute zawng zawng inpekna rah a ni, a ti a. Field-a thawk te a lawmpui thu a sawi. ICDS hmalakna leh hnathawh hrang hrangte sawiin, India ram chu Welfare State a nih thu leh sawrkar pawhin mipuite hamthatna atan kawng hrang hrangah hma lain ruahmanna a siam thu leh hetiang ang ram hi an awm loh thu a sawi a. Nu te hriselna atan pawh ruahmanna hrang hrang siamin, hnamdang ten nu te an dah pawimawh zia hriaa an nunchhuahpui angin kan la nunchhuahpui tawklo nia a hriat thu a sawi bawk. ICDS chu naupang than thu leh thang tha thei lote enkawl a, nu nau pawm leh nau paite hriselna atana thawktute in ni a, a hun taka in hna in thawh hian mi dam khawchhuahna a thlen thei a ni tih hria in, in hna hi ngaihlu thar ula, in theihna zawng zawngin thawk zel rawh u, tiin thawktute a chah a ni.

He hunah hian James Lalremliana, District Coordinator, Poshan Abhiyaan chuan an hmalakna leh kalphung sawiin, F. Hmingthanmawii, District Coordinator, PMMVY pawhin an hmalakna te a sawi bawk a ni.

Poshan Abhiyaan (National Nutrition Mission) hi India in programme lian tak a siam zing ami niin kum 2018 atanga hman tan a ni a, Mizoram-ah chuan kum 2019 atangin kalpui tan a ni. POSHAN Abhiyaan hnuaiah hian kumtin Award sem thin niin, hetah hian kawng hrang hranga hnathawk tha State te chu lawmman atan Citation leh pawisa fai pek thin an ni a, hei hian pawisa cheng maktaduai 1.5 a keng tel a ni. Hei bakah hian Anganwadi Workers ten nitin-a an hnathawh te an report thinna, Common Application Software (CAS) hnuaiah ICDS-CAS tih vuahin nitin-a Anganwadi Workers te hnathawh dan an thehluh chu Dashboard atangin Block leh District-ah te, State leh Central lam atangin enfiah thin a ni a. He an hnathawh danah hian ICDS-CAS Implementation Award hi Mizoram chuan dawng bawkin he Award hian pawisafai cheng maktaduai khat a keng tel bawk a ni.

He Award lawmna hun hi Pu Lalbiakliana, CDPO Serchhip chuan a kaihruai a, India rama naupang, nu naupai leh nau hnute pelai ten chaw tha an mamawh ang an hmuh theihna tura hmalakna, Poshan Abhiyaan hnuaia Mizoram in National Award a lak lawmna hi ICDS Project tinah neih tura tih anih angin Serchhip ICDS Project chuan he Award lawmna a buatsaih a nih thu a sawi a ni.

He hun hi Pu R. Sathiyasundaram, IPS, SP Serchhip, Pu Vanlalhmachhuana, BDO Serchhip leh khawtlang hruaituten an tel pui a, ICDS Serchhip Project hnuaia thawktute an tel tha hle a ni.