Vawiin khan Champhai DC Conference Hall ah District Election Officer Pu Vanlalngaihsaka chuan Champhai District huam chhunga Assembly Constituency 5 heng A/C No. 21,22,23,24 leh 25 te tana buatsaih Special Summary Revision of Electoral Roll chu a tlangzarh a ni.

He hunah hian Champhai khaw chhunga Political Party hrang hrang hruaitute leh NGO hruaitute chu sawm an nih angin an tel tha hle a. Election Officer Pu Lalremruata Kullai chuan Election kaihhnawiha Form hman thin hrang hrang heng Form 6,7,8,8A te hmanga hming thlak, hming thunluh, vote thlakna/neihna insawn leh thil dang tih theihte chu zirtirna pe in kalkhawmte atangin hriatthiam loh leh hriatbelh duh te chu a hrilhfiah nghal a, rawtna hrang hrang lut te pawh sawiho bawk niin summary Revision of Electoral Roll chu Party hrang hrang hruaitute hnenah DEO Pu Vanlalngaihsaka chuan a hlan nghal a ni.

Thutkhawmah hian Voter te tana hming thlak, hming paih, hming dahluh, vote neihna insawn leh adangte (Claims and objectives) chu September ni 15 atanga October ni 13, 2017  thleng tih theih ani tih tarlan a ni a. Hemi zawhah hian hearing neih a ni anga, Final Electoral Roll chu January ni 15, 2018 a tlangzarh theih tura ruahman a nih thu tarlan bawk a ni. Report atanga a lan dan in tun dinhmunah Champhai District ah Assembly Constituency 5 awmin, Polling Station 135 a awm a, Vote nei mi 82,851 (Mipa 41128 leh Hmeichhia 41723) an awm a ni.