Vawiin chawhnu khan Champhai District Task Force committee chu Self Employment Programme (SEP) chungchang ngaihtuahin DC Conference Hall-ah an thukhawm.

He thutkhawm hi Pu Pachhunga, SDO (S) chuan a kaihhruai a, member Secy, Pi V.Lalmuanpuii, DUDO chuan Self Employment Programme chungchang sawifiahin, he component-in a tum ber chu khawpui mirethei emaw, mirethei pawlte hnena skill, training, aptitude leh an chenna dinhmun a zir zela eizawnna mumal emaw, sumdawnna tenau emaw an neih theihna tura sum lama tanpui theih dan zawn a ni, a ti a, khawpui mirethei Self Help Group te nen Bank loan awlsam zawk an hmuh theih dan tur leh, interest subsidy pek theih dan tur thlengin a huam a. SEP hnuaiah hian hmeichhiate chuan hamthatna 30% an dawng tur a ni, tih sawiin, loan pek chhuah tura ruahmanna awmsate leh interest subsidy chungchang te a sawifiah bawk.

Task Force committee chuan SEP loan dil hun chhung atan hian tun thla ni 21 atanga October ni 10 chhung ruatin, interview chu October ni 12-16 chhunga neih turin an ruahman a, vawiin an thutkhawmah hian SEP hnuaia trade hrang hrang dil theih turte an thlirho nghal bawk a ni.