Sorkar laipui atanga tanpuina hrang hrang dawn atanga hmalaknate enfiah a harsatna te leh kal zel dantur sawihovin nimin khan District Level Vigilance & Monitoring Committee chu an Chairman Pu CL Ruala, MP (LS) leh Co-Chairman Pu Ronald Sapa Tlau, MP (RS) hovin Champhai DC Conference Hall-ah an thukhawm a. He hun hi Pu JH Rothuama, NIB Chairman leh Champhai South bialtu MLA ni bawk; Pu TT Zothansanga, Parliamentary Secretary leh Champhai North bialtu MLA leh Pu T. Sangkunga, MYC Chairman leh East Tuipui bualtu MLA ni bawk ten an telpui a. Champhai Addl DC Pu C. Lalzarliana leh RD Programme leh a kaihhnawih khawihtu Sorkar Department te an tel bawk.
Chairman Pu CL Ruala chuan Zokhua a chengte tih hmasawnna tura Sorkar laipuiin peng hrang hranga hmasawnna rahbi a kalpui mekte ram mipui leh khawtlangin tangkai taka a chhawr zui theihna turin hmasawnna hnathawktuten rinawm leh thahnem ngai taka tha thawk turin kalkhawmte chu a sawm a ni.
Meeting-ah hian MGNREGA kaltlangin kumin hian Champhai District-ah Job Card nei mi 28340 te tan ni 27 inhlawhna pek anih thu leh kumin (2015-2016)ah Job Card nei mi 27658 tan ni 10 kalpui anih tawh thu leh nikum aiin Jobcard holder mi 682 a a tlem zawk thu tarlan a ni bawk. MGNREGA hnuaia hmalakna te hi khawtlang leh society-te tan an huan, leilet leh ran vulh leh sangha khawi te tichangtlung tura hmalak puina te kalpui a ni tlangpui.
IWMP hnuaiah hian Champhai District hi Project pasarih ah thliar in, khua 28 a huam a. Project pahnih ah kumin chhung atan pawisa hmuh a la ni lo a ni. Inkalpawhna kawngpui (PMGSY Road) ah tuna siam mek kawngpui zingah chhan hrang hrang vanga huntiam chhunga thawh zawh loh chungchangte thlirlet anih bakah thingtlang mite tuithianghlim pekna kawnga hmalakna (National Rural Dringking Wated Programme) scheme hnuaia PHED hmalakna te thlirho a ni a. Nirman Bharat Abhiyan chungchangte, National Social Assistance Programme chungchangte sawiin CDPO ten report an pe a.
Scholarship & Upgradation of Merit of Schedule Tribe Students chungchangte leh RGGVY (Rajiv Gandhi Grameen Vidhutikaran Yojana) chungchangte thlirlet a ni bawk. RGGVY hnuaiah hian unelectrified villages 5, partially electrified villages 79 leh energisation of unelectrified villages 5-a hnathawh tur te chu a vaiin zawh a ni tawh a ni.
Mid day meal leh Infant Mortality Rate a Champhai District dinhmun te sawiho a ni bawk a. Hmalakna kawng hrang hrang thlirletnaah hian beisei phak loh deuh thenkhat awm bawk mahse, a tlangpuiin tha thawkhat a ngaih a ni.
