3168/2022-2023

Champhai, 31st December, 2022: Nizan December ni 30, 2022 (Zirtawpni) zan khan Mizoram Fire & Emergency Services, Champhai Fire Station-a thawktute chuan Pu F. Lalchhandama, Station Officer hovin Champhai khawpui chhung hmun 5; Vengsang, Dawrkaikawn Kahrawt Veng, Darthangvunga Traffic Point Vengthlang, Kanan Veng leh New Champhaiahte Kumthar lo thleng tur vuakveta halpuah leh halmawi hal lo tura mipuite ngenna Street Campaign kaltlangin an nei. Aurinna kengin khawlai an fangkuala, mipuite zirtirna pein ngenna an siam nghal bawk a ni.

Street Campaign hmang hian halpuah, halmawi leh a kaihhnawih halin boruak a tihbawlhhlawh dante, mihring hriselna a tihchhiat theih bakah kangmei a tihchhuah theih dante an puang chhuak a. Halpuah, halmawi leh a kaihhnawih dangte hal lo turin mitinte an ngen a ni.

Tul lova sum sen ralna anih bakah halpuah, halmawi leh a kaihhnawih halin damlo, thawk lama harsatna nei, tar chaklo leh lung tha lo te tan harsatna a thlen bawk avangin sawrkar thuchhuahte ngaipawimawh turin mitinte an ngen a. Khua a lo ṭhal chhoh leh tak avangin mitinte kangmei tichhuak lo tura fimkhur ṭheuh turin an ngen nghal bawk a ni.

Mizoram Fire & Emergency Services, Champhai Fire Station-a thawktute hian December ni 23, 2022 zan khan Champhai khawpui chhung hmun 5 ah Street Campaign an lo nei tawh bawk a ni.