3167/2022-2023

Champhai, the 30th December, 2022: Law & Judicial Minister Pu T.J. Lalnuntluanga chuan vawiin chawhma dar 10 khan MZP Headquarters Champhai Conference vawi 1-na, 'Zirlalite ram leh hnam tan' tih thupui hmanga Vanhnuailiana Hall, Ruantlanga hman chu khuallian niin a hmanpui.

Khuallian Pu T.J. Lalnuntluanga chuan MZP Champhaiah mithar chan a chan loh thu leh neitu thinlung a put thu sawiin, MZP Hqrs. Champhaiin Conference vawi 1-na changtlung tak a hmang thei chu a lawmpui thu a sawi a. Ram leh hnamin harsatna a tawhin MZP in theihtawp chhuahin hma a lak thin thu sawiin, 'Zirlaite ram leh hnam tan' tih thupui thlan chu inhmeh tiin, zirlai kalkhawmte chu ram leh hnam tana lehkha zir an nih thu a hrilh a. Ram leh hnam mai bakah sakhuana thlenga vawnnun a pawimawh thu pawh sawiin, hnam leh sakhuana kalkawp tira diklo hnawl ngamna hmangin hmasawnna dik tak kan thlen thei dawn a ni, a ti a. Sakhuana leh hnam kan kalkawp tirin huaisenna min pe thei dawn a, chu chuan kawng dik min zawh tir thei dawn a ni, a ti bawk.

Law & Judicial Minister chuan ngaihtuahna dik leh tha neih hmasak a tul thu leh hlawh hmu tlaka thawh a pawimawh thu sawiin, kan thil ngaihven leh thlir dan a dik hmasak zet hnuah hmasawnna dangte a tahtawlin a rawn awm zel dawn a ni, a ti a. Ngaihdan leh zeldinna tha lo te bansana, midangte nundan leh thil tihah buai mai lova mahni hmazawna mawhphurhna tlate tha taka hlen a pawimawh thu a sawi a. Hnam dangte nunphung leh tihdante dahsang bik mai lo tur leh mahni inzaha indahchungnunna neih tum turte, hnathawh hreh nei lova mahni intodelh leh chhungte pui thei tura ngaihtuahna seng turtein kalkhawmte a chah bawk.

Pu T.J. Lalnuntluanga chuan zirlaite chu nakin lawka ram leh hnam innghahna leh khaidingtu turte an nih thu tarlangin, khawtlang, kohhran leh sawrkara fawng pawimawh tak tak chelhtu tur an nih dawn avangin an rilru sukthlek leh ngaihtuahnate her dik hmasa turin a fuih a. Ram zimte mipui tlemte awmna ram hmasawnna leh kalzelna tur ngaihtuahin mahni hmakhua chauh ngai lova, ram leh hnam kan dah pawimawh hmasak zawk fo a tul a ni, a ti a. Zirlaite chu social media hman chin tawk thiam tur leh social media kaltlanga thil vawrhdarh nazawngte awih nghal mai thin lo turin a chah a. Ram hmasawnna leh thang mek zelah zofate kan hniam bik loh thu sawiin, indahniam bik mai lova hmasawn zel tum tura kan pen chhuah a tul takzet a ni, a ti a. Zirlai kalkhawmte chu midangte dah chungnung bik mai lova, Pathian malsawmna an dawnte chhawr tangkaia inrintawkna nen hlawhtlinna chang thei tura theihtawp chhuah turin a chah bawk a. MZP Hqrs. Champhai member-te chu ngaihtuahna leh beiseina eng nei tura chahin an kalzelna turah duhsakna a hlan a ni.

He hun hi Tv Lalpianpuia, Vice President, MZP Hqrs. Champhai chuan kaihruaiin, Rev. H. Zalianchama, PCI Ruantlang-in hunserh a hmang a. Tv H. Lalruatdika, Secretary, MZP Hqrs. Champhaiin report a pe a. MZP Hqrs. Champhai President Tv Thangdeihmanga, Sub Hqrs. YMA Champhai Fin. Secretary Tv Lalchhanhima Zofa leh Tv Lalnunsanga, Vice President, Tuipuiral Zirlai Pawl (TZP) te'n he hunah hian thu an sawi bawk.

MZP Headquarters Champhai Conference vawi 1-na hi nimin December ni 29, 2022 zan khan tan a ni a, vawiin nilengin program hrang hrang hmanho a ni a, zanin hian Conference hi a tiak dawn a ni.

MZP Hqrs. Champhai hi kum 1994 a din a ni a; an hnuaiah hian Sub-Hqrs 5 leh Branch 17 te an awm mek a ni.