Champhai Grape Growers' Society chuan Guwahati a inbun Radiant Manufacturers Pvt. Ltd. nen inremna siamin, kum 2015-16 chhungin Grape tharchhuah atanga Grape Tui (Wine Concentrate) Litre 1,50,000 hralh turin inremna (MOU) an siam.

Champhai Grape Growers' Society in vawiin chawhnu khan Champhai Tlangsam a an khualbuk Samuel's Inn-ah Press Conference kovin, Radiant Manufacturers Pvt.Ltd hnenah kum 2 chhung atan inremna hi January 26,2015 khan Guwahati-ah siam anih thu leh kum 5 chhung atan pawhsei theih tura siam anih bakah Wine siamna lama thuk zawka insumdawn tawnna tur inremna pawh siam tel a nih thu sawi a ni.

Grape Growers' Society Chairman Pu B. Remmawia kaihhruaiah hian General Secretary Pu R. Thangseia chuan Inremna siam anih dan tlangpui tarlangin, chhan eng eng emaw avanga 'Zo-wine' leh 'Zawlaidi' dehralna kawngah harsatna an tawh thu te leh kum kalta a Grape Quintal 1,400 thar chhuah atrangin, litre 1,00,000 vel Grape tui sawrchhuah a nih thu a tarlang a ni.

Radiant Manufacturers Pvt. Ltd. hian heng Grape tui hi Vinho Porto Wine-ah an siamchhuak dawn a. He Company hi Vinho Porto Wine an siamna atana kumtin Grape tui Litre 3,60,000 mamawh thin niin, Grape tui hi Goa State atanga lak thin an ni a. Liquor, Bottling leh Distillery siam chhuakin, Bonded Warehouse leh Retail-a hralh chhuahna pawh an neih bakah India Hmarchhak a ENA siam chhuak thei hmasa ber niin, ni khatah ENA Kl 45,000 an siam chhuah theih thu he hunah hian tarlan a ni bawk.