No.4441/2020-2021

Dated Champhai, the 26th August, 2020: Naktuk August Ni 27, 2020 a Village Councils Election 2020 neih tur atan Champhai district huamchhunga inpuahchahna hrang hrangte chu zawhfel niin, Champhai district chu Village Council Elections 2020 nei turin a inpeihfel tawh a ni. Inpuahchahna hnunhnung ber ni turin vawiin khan District Election Office, Champhai huaihawtin Champhai khawpui chhung leh a chhehvel hnaivai khuaa inthlan buaipuitu tur Returning Officer (RO) 29 leh Presiding Officer (PrO) 34 te pualin training Govt. GM High School, Champhai Vengsang-ah buatsaih a ni a, inthlanna tura hmanraw mamawhte semchhuah nghal a ni.

Pu Lalnunfela Chawngthu, Asst. District Election Officer chuan kum danga inthlan neih thin anglo takin inthlanna buaipui angaih thu leh Covid-19 hrileng laka him theihna tura hmalak anih dawn thu sawiin, election material mai bakah Covid-19 laka invenna hmanruate semchhuah tel anih thu a sawi a. MPF leh YMA te nena thawkhovin inthlanna muanawm leh Covid-19 laka him theihna turte buaipui tum a ni, a ti a. Inthlan buaipuitu tur RO leh PrO te chu training hun tha tak hmang tura duhsakna hlanin, inthlanna felfai leh muanawm neih anih theihna tura theihtawp chhuah theuh turin a chah nghal a ni.

He hunah hian Master Trainer Pi Esther Leihang, DLAO/SDC hnen atangin inthlanna buaipui kawnga RO leh PrO te mawhphurhna leh tihtur hrang hrangte, Electoral Offences leh form pawimawh hrang hrang chungchang leh tul dangte ngaihthlak a ni a. Master Trainer dang Pi R.Lalnunkimi, DTO/BDO Champhai hnen atangin vote tla chhiar dan tur leh vote tla chhiar huna hriattur pawimawhte ngaihthlak a ni bawk.

Vawiin chawhma khan inthlanna ralmuang leh muanawm tak neih anih theihna tur kawnga venhimna buaipuitu tur Police-te chuan Champhai Police Station-ah Addl. SP Pu C.Lalengliana, Nodal Officer, Police Management & Security Duty kaihhruaina hnuaiah thil tul leh mamawh angte inhrilhhriatna hun an nei a, hetih rual hian Zokhawthar Police Station leh Dungtlang Police Station-ah te Officer-in-Charge (OC) hovin inhrilhhriatna hun an hmang bawk a ni. He mi hnu hian hmun hla deuh zawka duty tur Police-te chuan an duty-na tura ruat khaw hrang hrangte an pan nghal a ni. Kumin Village Councils Election neih tura venhimna lam buaipui tur hian Polling Station-a duty tur Police 69 te ruat an ni a. Heng bakah hian Member 3 theuh awmna Quick Response Team (QRT) te siam niin, inbiakpawhna that lohna Tuipui khuaah MPRO 1 duty dah a ni a, an hmalaknate thlithlaia vil turin Zonal Officer pahnih, DSP (Hqtrs) Champhai leh SDPO Champhaite chu ruat an ni bawk.

Champhai District Village Councils Final Electoral Roll, 2020- tlangzarh takin a tarlan danin Champhai district chhungah VC 62- a awm a, Voters 50,452 an awm dawn bawk a ni. Champhai district chhungah hian Village Councils seat 282 a awm a, heng zinga 208 hi General seat niin, 74 dangte chu hmeichhiate tana hauh reserved seat a ni a, Village Councils seat 3 nei hi 26 awmin, seat 5 nei 24 leh seat 7 nei 12 an awm a ni. Polling Station 62 ah Polling Booth 71 leh Voting Compartment 104 siam tum niin, Polling Station 9 (Bethel, Farkawn, Hnahlan, Kahrawt, Kanan, Venglai, Vengsang, Vengthlang, Zotlang ‘E’) ah te Polling Booth 2 theuh siam tum ani a, a bak zawngah Polling Booth 1 theuh a awm ang. Inthlannna buaipui tur hian Returning Officer 62, Presiding Officer 71 leh Polling Officer 128 te ruat niin, Counting table 191 siam tum a ni bawk.

Village Councils inthlanna tura Electoral Roll thar ber tlangzarh takin a tarlan dan chuan Champhai district chhungah vote nei mi 50,452 an awm a, heng zinga 24,621 hi mipa niin 25,831 te hmeichhia an ni a, hmeichhia vote nei hi mipa aiin 1,210 in an tam a ni. VC malah Vengthlang VC huamchhungah vote nei tam berin mi 2,436 an awm a, New Hruaikawn VC huamchhungah vote nei mi 113 awmin a tlem ber a ni.