No.4442/2020-2021

Lawngtlai, Thlazing ni 26, 2020: Vawiin khan Lawngtlai DC Conference Hall-ah Bawrhsap Dr Andrew H. Vanlaldika, MCS hovin Lawngtlai District chhunga ran khuahkhirh kawnga hma lak dan tur hrang hrang sawi ho a ni.

He hunah hian District Administration leh police lam bakah, DRDA Project Director, DIPRO, state leh LADC-a AH & Vety Officer, LADC Sanitation Officer, VC Association, Central YLA leh District MJA ai awhte an tel a. Ran khuahkhirh kawnga hma lakna kal mek thlir hovin, hmasawnna tur leh hma lak thar dan tur te an ngaihtuah ho a ni.

Bawrhsap chuan ran khuahkhirh that a nih leh nih loh chu khawpui hmasawnna leh changkanna tehna pakhat a nih thu sawiin, buh leh bal leh huan thlai bakah, mihring leh ran vulh dangte him nan te, khawtlang a lo fai a, a lo thianghlim theih nan te ran khuahkhirh chu a tul hle a ni, a ti a. Sawrkar atangin thu chhuah awm mah se, a hlawhtlinna tur chuan a bawhzui kawngah VC leh tlawmngai pawlte nena tan rual a, mipuite pawhin thu an awih a pawimawh a ni, a ti.

Lawngtlai Bawrhsap hian August ni 18, 2020 khan Lawngtlai District chhunga ran khuahkhirhna thupek a lo chhuah tawh a. Chutah chuan thlun lohva khawlaia ui chhuah leh vawk leh ar vulh khung lohva chhuah te, sial, bawng leh kel te enkawltu awm lova khawlai leh ramhnuaia tlattir leh ram dang leh district dang atanga Lawngtlai District chhunga ran lak luh te khap a ni a. He thupek hi sawrkar leh khawtlang thuneitu leh tlawmngai pawlte nen tang tlanga khauh zawka bawhzui tum niin, zawm a hlawh leh zual theih nan member-te'n a khat tawka khawpui fan kual thin ni se, tih a ni a. LADC huam chhunga ran khuahkhirhna leh enkawlna dan hman lai, The LADC Animal Control & Prohibition Act, 1984 zulzuia hma lakna tur te pawh sawi ho a ni.