No.4443/2020-2021

Dated Serchhip, the 26th August, 2020: Village Council inthlan, 2020, naktuk ni 27th August zing dar 7 atanga tlai dar 5 inkara neih tur atana Serchhip District inbuatsaihna chu engkim peih fel a ni ta.

District chhunga VC 54 inthlanna atana Presiding Officers te training hnuhnung ber chu; nimin khan Serchhip atanga khaw hla deuh a duty turte puala neih niin inthlanna atana an hmanraw mamawh zawng zawngte hlan nghal an ni a. Vawiin hian an duty na tur hmun an pan hlawm a. Serchhip khaw chhung leh a hnaivai khuate tana Training hnuhnung ber vawiin hian DC Conference Hall ah buatsaih ve leh niin training neih zawhah an hmanraw mamawhte hlanna neih zui a ni. Nimin leh vawiia Presiding Officers training te hi Pi Dorothy Muansangi, Master Trainer, SDO, N. Vanlaiphai chuan zirtirna a pe a ni. Tin, security lam thawktu turte pawhin an duty na hmun tur hi an pan vek tawh a, thuneitu sang zawk atanga ruahmanna awm angin tam dan a zirin Polling Station an Police pakhat emaw pahnih an duty vek dawn a ni.

Serchhip District Observer Pu Robert C. Lalhmangaiha chuan, Serchhip district inbuatsaihnate chu fel fai leh tha tawk nia a hmuh thusawiin, District Election Office leh khawtina duty tura ruat zawng zawngte inpeknaah lawmthu a sawi a. Inthlanna thianghlim leh fel fai tak buatsaih turin duhsakna a hlan a ni. Mipuite chu kokim taka vote thlak vek tura sawmin, hripui leng mek laka himna tura ruahmanna te tha taka lo zawm ngei turin a chah bawk.

Inthlanna hi naktuk zing dar 7 atanga tlai dar 5 inkarah neih tur a ni anga, chumi zawhah Returning Officer ruat ten vote chhiarna an nei zui ang. Result te chu DEO office a Data Management Centre leh Control Room ah an rawn report nghal zel dawn a ni.

Attachment

  • Loading attachment...