Vawiin khan  Large Size Agriculture Multipurpose Co-operative Society (LAMPS) Ltd  Champhai chuan Annual General Assembly vawi 38 na Champhai Venglai Community Hall-ah an hmanga, he hun hi  Dr. Naveen Aggarwal, District Bawrhsap chuan khuallian niin a hmanpui a, Pu C. Lalbethlehema, ARCS, Champhai chuan khualzahawm niin a hmanpui a ni.  

Thusawiin khuallian chuan Agriculture leh a kaihhnawih thil hi Mizoramah chuan kan eizawnna tam ber a ni a, State thenkhatah chuan lo neih hi eizawnna atan an hmang a, Mizoram ah erawh chuan lo neih te hi kan ram zawl in a daih loh vang te, a enkawlna kan neih that tawkloh avangin eizawnna tak tak atan a hman theih lova, chutiang a ni chung chuan Champhai hi buh thar hnem ber pawla sawi a ni thei zel a ni, a ti a. Bawrhsap chuan loneituten an buh leh thlai hmang a sum tam zawk an lakluh theihna tura tanpui chu an tum ber a nih thu a sawi a.  Buh leh thlai chawmna tur tuilakna pawh siam tura hmalak mek a nih thu leh tui kawng hi hman theiha peih a nih hunah chuan loneitu hrang hrangte hian an la hmang tangkai dawn a ni, a ti a. Nakin zelah loneituten LAMPS kaltlangin  Loan leh hamthatna dangte pawh  an la dil dawn avangin LAMPS pawh lo inhawng tura ngenin an kalzelna turah duhsakna a hlan a ni. 

Khualzahawm Pu C. Lalbethlehema, ARCS Champhai pawhin thusawiin Society thil tum ber pakhat chu inlungrualna siam  hi a ni, a ti a. Society member te chu member an nih anga an tih turah  chiang a, inlungrual taka thawkho turin a chah a. Inlungruallohna  avanga  Society chhunga  buaina awm thei thilte tarlangin LAMPS chu an kalzelna turah inlungrual taka an thawh theihna turin duhsakna a hlan a ni. 

He hun hi  Pu JC Chawngvawra, Chairman Champhai LAMPS chuan a kaihhruai a. Pu C. Ralkapzauva, Secretary leh Pi Lalbiakchhungi, Manager LAMPS te hnen atangin report ngaihthlak a ni a, kum 2018-2019 chhunga member boral mi 9 te sunna hun hman a ni bawk. 

Chawhnu lamah rorel inkhawm neih niin,  Agenda hrang hrang; Member thite ralna ennawn chungchang te, LAMPS  Building thar sak that leh LAMPS Office chungchangte sawihovin hun an hmang a. Pu C.Lalrizapa, Vice President-in lawmthu sawina neiin Annual General Assembly vawi 38 na hi a khar a ni.  

Champhai LAMPS hnuaia PACS hi kum 2013 ah din niin, din anih atang hian bahlah lovin vawiin thleng hian an la kalchho zel a, PACS hian member huan / lo siamtute leh kuthnathawktuten thlai leh buh leh bak tam zawk an tharchhuah theihna atana sum an mamawh puk tir leh hamthatna hrang hrang an dawn theihna tura remchang siam sak chu a tum ber  a ni.  

Tun dinhmunah hian Champhai LAMPS ah hian member 272 awm mekin,  'A' Class member 30 leh Individual member 242 an awm mek a, kum 2018-2019 chhung hian member boral 9 an awm a, ralna atan cheng sang 2 theuh pek an ni.