Vawiin hian Dr. R. Lalthangliana, Minister, Health & Family Welfare, Commerce & Industries, etc., chuan Hrangturzo bial chhunga khaw hrang hrang Bawktlang, N. Mualcheng, E. Lungdar, Biate leh Keitum te a tlawh kual a. Heng khuaa Health Department leh Commerce & Industries hmunhma te a en kual bakah khawtlang hruaitute nena inkawmna hun te a neihpui a. E. Lungdarah Remna Ni Pualin Martar thlanmual ah Pangpar dahna hun a hmang. Khaw hrang hranga amah lo dawngsawngtu khawtlang hruaitu leh mipuite hmaah hriselna lama hma kan sawn zel theih nan kan nun kan uluka, damlo titlem tura ka invawn uluk deuh deuh tul thu a sawi.
Nimin tlai lamah khan Minister hian a bial chhung khua, Chawngtui South tlawhin khawtlangin ropui takin an lo hmuak a. An khawtlang mamawh te ngaithlaiin Community Hall ah Public Meeting buatsaih a ni a. Zanah N. Vanlaiphaiah a riak a ni.
Tukin zingah Bawktlang panin Bawktlang khawtlang hruaitute nen inkawmna hun an nei a, an khawtlangin Health Clinic atan Rs. 7 Lakh senga in an lo sak fel tawha thawktu dah tura an lo dil chu a ngaihtuah sak tur thu a hrilh a. An mamawh dang dilte pawh a tul anga a umzui pui tur thu a hrilh a ni.d
Bawktlanga hun a hmanzawh hian N. Mualchengah khawtlang hruaitute nena inkawmna hun nei lehin Sub Centre building thar leh staff qtrs an lo dil chu a theih anga a bawhzui sak tur thu hrilhin amah tawiawmtu Health Department Officers ten Sub Centre hmunhma hi an tlawh nghal a ni. Minister hian Sub Centre aia u deuh, B.Sc Nursing awp tur Health & Wellness Centre engemawzat kan sawrkarah hian kan din thar dawn a. Chungte pawh chu Mualcheng hian a mamawh nia a hriat thu a sawi a ni.
Hemi hnu hian Minister hian E. Lungdar pan lehin E. Lungdara Martar Thlanmual ah Remna Ni pualin zahna pangpar a dah a. He thlanmualah hian Pu Laldenga thlanx telin mi 18 lungphun a ni. Hemi zawhah E. Lungdar PHC a tlawh leh a, thawktuten mamawh an lo thlen hrang hrangte ngaithlain damdawiin hmunhma te a enkual nghal a ni. He hunah hian Minister chuan, hun engemaw chen doctor nei lova E. Lungdar PHC a awm hnuin tunhnai maiah Doctor thar dah a ni ta a. Doctor baka hnaruak la awm te pawh sawrkar chuan engemawzat lak tumin ruahmanna siam a, budget pawh engemawzat dah a ni, a ti. Health lama thawktute tihchak mai bakah Health Care Scheme tha zawk nei turin ruahmanna lian tham tak duan mek a, Health & Wellness Centre pawh building thar te nen engemawzat kan din thar dawn a ni, a ti bawk. He hunah hian Dr. Laldinpuii, MO, E. Lungdar PHC chuan lawmthu a sawi a ni.
E. Lungdara hun a hman zawh hian Minister hian Biate a pan leh a, Samuel Tea Factory tlawhin Factory neitu Pu Lalthanpuia leh Biatea Thingpui ching Association hruaituten an lo dawngsawng a. Thingpui Chingtuten Thingpui zik an hralhna, Kg 1 Rs. 15 chu an tan a hlawk zo lo hle tih lo hrilhin, chhungkaw 300 chuang Thingpui huan nei kan awm laiin chhungkaw 30 vel chauhvin tunah hian Thingpui an sik peih a ni, an ti a. Price Support kg 1 ah Rs. 5 tal sawrkarin pe turin an lo dil a ni. Minister chuan, SEDP hnuaiah Biatea Thingpui chingtu zawng zawng ten phur tak leh hlawk taka an thingpui huan an kalpuia, an enkawl ngei theihna tur ruahmanna rawn siam kan tum ang a. A tul ang zela inberawn chungin, a herna khawl tihlen a tul emaw dahbelh a ngai emaw, Industrial Development Committee chuan in tana tha tur ngei ruahmanna rawn duan chhuah a tum dawn a ni, tiin a chah a ni.
Hemi zawh hian Zialung Community Hall ah Biate khawtlangin amah hmuahna inkhawm an buatsaih chu a telpui leh a ni. Thusawiin Minister chuan, Biate thlunzawmtu kawngpuite tihzauhna te, siamthatna tur te sum engemawwzat dah a ni a. Biate leh Bungzung inkar kawng pawh PMGSY atanga thawh tura ruahmanna siam a ni, tih a hrilh a ni. Dr. R. Lalthangliana chuan, hriselna lamah hma kan sawn theih nan mitinin mawhphurhna kan nei vek a. Hospital leh Medical Centre te pan ngai lova nun hrisel neih tuma hmalak uar deuh deuh a tul tak zet a ni. Faina leh inlungrualna lama mite entawn Biate chu khaw hrisel, damlo tlemna khuaa din lo tum turin a fuih a, nun thianghlim leh hriselna kawng zawha kan ramah damlo tihtlem a ngai a, inzirtirna nasa zawk neiha, invenna lam kan uar a tul a ni, a ti a. Biate CHC tihchangtlunna tur leh thawktute a tul ang zela dah belh hna pawh kan thawk dawn a ni, a ti bawk.
Hriselna lamah Mizoramin nasa takin hma a sawn tih sawiin tun May, 2019 a Sample Registration System Survey report a tihchhuah tharah Mizoram Infant Mortality Rate chu 15 ah a tla thla dawrh mai a. Kum 2010 ah kha chuan 37 lai kan la ni kha a ni a, hei hi thil lawmawm leh chhinchhiah tlak a ni. Tin, tun hnaiah NITI Ayog in India rama State hrang hrangte hmalakna report a siamah Mizoram chu State te te zinga hriselna lama thawk tha ber kan ni bawk. Hetianga dinhmun duhawm taka kan din chhan chu Health Department peng hrang hrangte thawhrimna te, NHM hmalakna tha tak vang te leh Department hrang hrangte thawh hona that vang leh Mizoram mipuite thawhrah a ni a, a ropui hle a. Health Department tihchangtlunna hna hi nasa zawkin kan thawk zel dawn a, tun hnai maiah pawh Centres hrang hranga damdawi supply tihpuna tihchak thar a ni a, kan CHC, PHC leh Sub Centres ten an tangkaipui hle a ni, a ti.
Zialung Community Hall a hun a hman zawh hian Minister hian Biate Community Health Centre chu tlawhin chipchiar takin an hmunhma a en leh a ni. Biate CHC hi Hospital fai inelna Kayakalp ah tum hnih lawmman pakhatna lo dawng tawh a ni. Biatea hun a hman zawh hian Minister hian Keitum Sub Centres tlawh lehin an mamawh hrang hrangte a ngaithla bawk a ni.
Minister hi Aizawl atangin Pu. HD Lalrintluanga, Jt. Director (Commerce Wing), C&I, Department, Dr. Eric Zomawia, Mission Director, NHM, H&FWD, Dr. C. Lalzepuii, Jt. Director (Planning), DHS, Dr. Mary Lalrammawii, MO (AYUSH) ten an tawiawm a. Serchhip atangin Dr. Laldawngliana Sailo, CMO, Serchhip leh Pu K. Saitluanga, DIPRO Serchhip ten an tawiawm bawk a ni.
Attachment
- Loading attachment...
