Champhai leh Khawbung block-a school hrang hrangte tan vawiin khan Minority Scholarship chungchang I&PR Auditorium-ah inzirtirna neih a ni.

He hunah hian Er.Lalmuankima Sailo, Technical Officer, Mizoram Scholarship board chuan zirtirna a pe a. A hmaa minority scholarship dilna, application form hmanga thehluh thin chu kumin atangin online veka kalpui a ni tawh dawn a. School hrang hrangte chuan hemi kawngah hian mawhphurhna an nei lian dawn hle a ni, a ti a, nikum khan online hmang hian high school leh a chunglamte chu scholarship hi diltir an ni a, anmahni-in thil engkim an buaipui a. Kuminah chuan primary leh middle school te pawhin online hmanga an dil a tul tawh dawn bakah, school hnenah application an thehlut ang a, dilna hi school-in a endik hnuah application dik nia a hriatte chu pawmin online hian a dilsak thei dawn a. Application dik lote chu a hnawl thei dawn bawk a. Zirlai application dik lova dilsak an awm a nih chuan school-in mawh a phur dawn a ni, tiin a sawi.

Hei bakah hian online-a scholarship form fill up dan tur hrang hrang chipchiar takin zirtirna a nei bawk a, zirtirtu kalkhawmte hian an hriatthiam loh lai zawtin zawhna leh chhanna hun an hmang nghal bawk a ni.

Vawiin training-ah hian Champhai district chhunga Champhai leh Khawbung block-a primary, middle leh high school zawng zawng atangin aiawh pakhat theuh kokhawm an ni.