Vawiin chawhma dar 11 khan ruihhlo do beihpui thlak chungchanga Mizoram Sawrkar leh Central YMA thawhhona bawhzui nan Champhai SDPO Office-ah Champhai District chhunga Police, Customs leh Excise & Narcotics Department hotute leh Sub-Headquarters YMA hruaituten meeting an nei.

He meeting hi Champhai SP Pu RP Meena, IPS chuan kaihruaiin, Sub-Headquarters YMA, Excise & Narcotics hotute, Customs hotute leh Police hotute chuan Champhaia ruihhlo do beihbui thlak kawnga thawhho dan tur leh hmalak dan tur chipchiar leh zau taka sawiho na hun an nei a. YMA leh sorkar Department-te atangin 'Team of Convener' siam a, hmalak dan tur chipchiar pawh Team of Convener kuta dah ni se an ti bawk. Ruihhlo do kawng ah hian YMA Branch chhunga Drugs ti thin leh zuar thin -te survey neih bakah dan ang thlapa hma lak anih theih nan ruihhlo donna kawnga hma latutetan August ni 20, 2016, chawhma dar 11 ah Sub-Headquartes YMA Hall, Champhaiah 'Ruihhlo Do Training' neih ni se an ti a, he training ah hian Champhai YMA Branch-tin atanga aiawh te, kumpuan squad te leh damdawi tawlh luhna kawng pawimawh a awm YMA Branch aiawhte tel tura beihseih an ni bawk. He hunah hian Police leh Excise & Narcotics hotuten dan pawimawh leh hriat tul te hrilhhriatna hun an hmang dawn a ni.

Ruihhlo do kawngah hian YMA Branch-tinte hman tangkai ni se, information pek leh ruihhlo man kawngah theihtawp chhuah a hmalak thin ni se tih a ni a. Sorkar Department te sum indaih lohna a nasat avangin a theih ang ang a ruihhlo dona kawngah sum chung chang ngaihtuah chunga inpeizawn tlan thin ni se tih a ni bawk.