3949/2022-2023

Champhai, the 23rd March, 2023: Vawiin chawhma dar 11 khan Champhai Town Land Committee chu an Chairman Pu James Lalrinchhana, District Collector hovin DC Conference Hall-ah an thukhawm. He hunah hian thutkhawm hnunhnung ber May ni 11, 2022 leh vawiin thutkhawm inkara Champhai khawpui huam chhunga House Pass, Periodic Patta leh WRC Periodic Patta dilna lut 509 te chungchang ngaihtuahho niin, dan tlawhchhana zirchianna neih a nih hnuah dilnate hi pawm a ni.

District Collector Pu James Lalrinchhana chuan khua leh tuite hmakhua ngaia theihtawp chhuah tura din, Champhai Town Land Committee chu financial year khat chhungin vawi 2 aia tlem lo thutkhawm tura tih a nih thu sawiin, a tul a nih phawt chuan vawi 2 aia tam thutkhawm koh tum a ni, a ti a. Lehkha pawimawh tihfel loh avanga a neituten hma an la thei lo thin chu chinfel thuai a tul thu sawiin, dan anga lehkha pawimawh siam sak chu khua leh tui dik takte chanvo a nih miau avangin ngaipawimawhtlan a tul thu a sawi bawk.

Pu James Lalrinchhana chuan house pass, periodic patta leh WRC periodic patta dilna lut pawm tharte'n document pawimawh tak an nei thei tur chu a lawmpui thu leh dan ang takin Sawrkarah chhiah a lut thei tawh tur chu lawmawm a tih thu a sawi a; chhiah tling khawm atangin Sawrkarin hmasawnna ruhrel leh khua leh tuite hamthatna a buaipui leh thin a ni, a ti a. In hmun leh ram neihte dan ang taka chhinchhiah chu nakin zela hmasawnna ruhrel siam kawnga pawimawh hmasa leh inruahman lawkna tha tak a nih thu a sawi a. A nihna ang tur leh tangkai taka in hmun leh ramte hman a nih theih nan leh, dan lova hman a nih loh nana tanrual a pawimawh thu a sawi bawk a. Land Revenue & Settlement Office, Champhaia thawkte hmalakna chhuanawm a tih thu sawiin, Land Committee chu ram humhalhna atana pawimawh tak, khawpui ruangam din kawnga tangkai tak a nih avangin kum lo la kal zel tur thlir chungin dilna lutte ngun taka zirchian hmasak a tul thin a ni, a ti bawk.

Pu Lalneihthanga Colney, Settlement Officer & Member Secretary, Champhai Town Land Committee chuan Land Committee thutkhawm atana inpuahchahnate a tarlang a. In leh ram hmun tehfel ngaite tihfel zung zung a nih theih nan Land Committee member-te tawiawmna a ngen nghal bawk. Pu Lalrinzuala, Assistant Settlement Officer, Champhai hnen atangin technical report ngaihthlak a ni bawk.

He hunah hian Land Committee inkaihhruaina leh hnathawh dan tur Sawkarin a duante zirho a ni a. Dan lova in hmun leh ram neih a nih loh nana hmalak tul hrang hrangte sawiho niin, khawpui thang zelin a mamawh leh kentelte bakah ram humhalh kawnga pawimawhte sawiho a ni a. Mipuite chu chhiah pek ngaipawimawh tur leh, leiman tha taka Sawrkara chhunglut zel thin turin Champhai Town Land Committee chuan a ngen nghal bawk.

Vawiin Champhai Town Land Committee thutkhawmah hian Champhai khawpui huamchhunga veng leh khua 15 atanga dilna lut hrang hrang 509; house pass dilna 501, periodic patta dilna 7 leh WRC periodic patta dilna 1 te zirchiana ngaihtuahho a ni a. Land Revenue & Settlement Department zirchianna leh record neihte behchhana Champhai Town Land Committee-in ngun taka dilna lutte a ngaihtuah hnuah dilna lut zawng zawngte chu pawm a ni a; heng zinga dilna 2 EPIC No. thehluh tawh, fiah tawklote erawh a thara thehlut leh tura hriattir nise an ti bawk.

Vawiin Champhai Town Land Committee thutkhawmah hian Line Department hotute, VC leh Political Party aiawhte an tel a ni.