3948/2022-2023

Aizawl The 23rd March 2023: Vawiin khan City Centre, Bara Bazar, Dawrpui veng a sak tur lungphum phumna chu Dawrpui Multipurpose Hall-ah neih a ni a, Deputy Chief Minister Pu Tawnluia chu khuallian niin lungpumna hi a nei a ni.

Khuallian chuan thu sawiin, City Centre lungphumna neih ani ta chu hmasawnna leh changkanna rahbi thar; Aizawl khawpui cheitu tur ruhrel pawimawh tak a ni; a ti. City Centre chu Aizawl mi te tan mai ni lovin, Mizoram khaw hrang hrangte tan pawh tlawh chakawm tak anih dawn thu tarlangin, Mizoram tana hmun pawimawh leh tangkai tak a nih a beisei thu a sawi bawk. Mizoram sawrkarin uluk taka a ngaihtuah hnu ah Bara Bazar-a thu thinte an len vek theihna turin he project atana sum dah, cheng vaibelchhia 34 chu vaibelchhia 41.59 ah tihpun a nih thu tarlangin, Bara Bazar-a thu thinte nena inbiakna neih a nih hnuah pawisa dah pawh tihpun a ni; a ti. City Centre awmna tur Dawrpui veng chu tunhma atanga Aizawl veng hlun ber anih thin ang takin neitu thinlung pu a, he Project hlawhtlinna tur leh sakzawh anih huna a enkawl kawngah theihtawp chhuah zel turin Dawrpui Local Council, NGO leh veng mipuite chu a sawm nghal a ni.

Dy. Chief Minister Pu Tawnluia, UD & PA changtu nibawk chuan, City Centre chu Aizawl Smart City hnuaia project pakhat anih thu a sawi a. Smart City hnuaia project-te hi a kalkawng a thui thin hle a, a chhan ber chu uluk taka project vil thintu Project Management Consultants (PMC) awm vang a ni; a ti. Tuna sak tur City Centre pawh hi uluk taka kalpui niin, a leilung zirchiang tur pawhin state pawn lam atangin mithiam zawk (geologist) te rawih an nih thu a sawi a, contractor ten tha taka hna an thawh theihna turin UD & PA leh Project Management Consultants (PMC) ten an vil thin dawn tih a sawi a. City Centre hi sak zawh anih hunah Commerce & Industries Department-te kutah hlanchhawn anih dawn thu a tarlang bawk a ni.

Pu Lalrothanga,Chief Executive Officer, Aizawl Smart City Limited, chuan Technical Report pe in, contactor atan M/s Lushai Engineers thlan niin; Project Cost chu cheng vaibelchhia 41.59 ani; a ti a. City Centre building hi Block A (chhawng -7) leh Block B (chhawng-5) ah then niin, a vaiin dawr-1105 a awm dawn a,parking atan 4 Wheeler-31 Nos leh 2 Wheeler-79 Nos a awm thei dawn a.Cold storage, CCTV, Services lift, Office, Food court, Conference Hall, ATM booth leh thil tul dangte a awm dawn a ni, a ti.

City Centre lungphum phumna inkhawm ah hian, Pu V.Lalruatliana,Deputy CEO, Aizawl Smart City Limited chuan lawmna  thusawi neiin, Mizo Zaimi Inzawmkhawm (MZI) te zai ngaihtlak niin, Pi Zosangzuali, Chairman,Local Council, Dawrpui veng in lawmthu sawina neiin hun a khar a ni.