3947/2022-2023

Kolasib dated 22nd March 2023: Zanin khan Buhchangphai Community Hall-ah Mizo Zirlai Pawl Headquarters Kolasib Conference 2023 hman mek kharna inkhawm ah Pu K. Lalrinliana, Minister, Food, Civil Supplies & Consumer Affairs Department chuan khuallian niin a hmanpui a, Pu K.Laldawngliana, MLA, 4-Turial Assembly Constituency chu khual zahawm a ni bawk.

Minister Pu K.Lalrinliana chuan MZP chu sawrkar kal sual tur venna leh khalh ngiltu hmanraw pawimawh tak an nih thu a sawi a, MZP dinchhan pawimawh tak takte tarlangin zirna tih hmasawn bak ah kut hnathawh chawisan chu kan ram intodelhna tur chuan nasa lehzual a kalpui a țul thu a sawi. Zirna hmanga mahni intundinna tur a hnathawh leh a țul apianga intodelh tur a kut hnathawh zahpui lo turin kalkhawmte a chah a. Ram leh hnam tan a MZP an lo penchhuah tawhna chu fakawm a tih thu leh zofate inpumkhatna tur a an hmalaknate chu ropui a tih thu a sawi. Khawvel pum ah March ni 22 chu 'World Water Day' a nih angin tui renchem te, tui hna humhalhna tur a thing uar lehzual a phun te leh faina leh thianghlimna kawnga khawtlang nuam siam tur a hmahruaitu nih tum tlat turin Minister chuan kalkhawmte a chah bawk a ni.

Khual zahawm Pu K.Laldawngliana, MLA chuan MZP chu zirlaite hamțhatna humhalh sak tur a pawl din ni mahse ram leh hnam hmangaihna inzirtirna hmun pawimawh a nih tel a țul thu a sawi a. Ram leh hnam hmelma lian ber chu ruihhlo a nih thu sawiin MZP member-te chu ram hmahun thui tak innghahna an nih angin ruihhlo lak a fihlim tlat turin a chah bawk a ni. Pu K.Laldawngliana chuan zirlaite chu kan ram intodelh theih nan kan leilung hausakna haichhuak thei tur a thiamna chhawrtlak nei tur a fuihin an awmna apiangah zo nun ze mawi lantir țhin turin a fuih a. Kawnpui MZP Sub-Headquarters leh School of Nursing, Thingdawl tan Computer set a ruahman sak tur thu a sawi bawk a ni.

Pu C.Lalruatdika, President, MZP Headquarters, Kolasib chuan MZP chu zirlai intelkhawm pawl a nih angin zirna ngaih pawimawh hmasak a țul thu leh ram leh hnam humhalh leh hmasawnna tura a țul apianga penchhuah chu an dinchhan pawimawh tak a nih thu a sawi.

Zanin MZP Headquarters Kolasib Conference 2023 kharna inkhawm hi Pu RK Lalchhuanawma, Finance Secretary, MZP Headquarters Kolasibin kaihruaiin inhmelhriattirna hun te neih a ni a. Palai thlahna hun te hman niin Pu Lalrinhlua, Treasurer chuan kalkhawmte lawmna thu a sawi bawk a ni.

Kawnpui MZP Sub-Headquarters, Thingdawl MZP Sub-Headquarters leh Vairengte MZP Sub-Headquarters atangte in an dinhmun, hmalaknate leh hmachhawp ngaihthlak a ni. MZP Headquarters Kolasib Conference-ah hian thurel hrang hrang neiin chung zingah chuan Kolasib district chhunga zirna tih hmasawnna tur a hmalak te, Commerce subject zirna bulțan a nih theih nana hmalak te leh Kolasib district chhunga hnam dang dan lova awm dapchhuah an nih theih nan hmalak dan tur te rel a ni.