913/2023-2024

Champhai, the 26th June, 2023: State Election Commission, Mizoram thuchhuah angin Champhai Zion Veng VC By-Election neih tur a ni a. Hemi atana inpuahchahna kalzelah vawiin chawhma dar 10:00 khan District Election Officer, Pu James Lalrinchhana chuan Zion Veng VC By-election Draft Electoral Rolls, 2023 chu DC Conference Hall-ah a tlangzarh a, bu hnih theuh pollitical party aiawhte a hlan nghal a ni.

District Election Officer Pu James Lalrinchhana chuan VC te chu ram inrelbawlna kawnga pawimawh tak leh sawrkar kutke pawimawh tak an nih thu a sawi a. Zion veng VC by-election neih tur bultanna hmasa draft roll tlangzarhna hun tha tak neih a ni thei chu lawmawm a tih thu sawiin, thawhhona duhawm tak hnuaiah hun bi thliah ang zela felfai taka kalpui a beisei thu a sawi a. Inthlanna dik leh muanawm nei turin electoral roll felfai leh thianghlim neih a pawimawh hmasak thu sawiin, kalkhawmte chu vote nei theite zawn chhuah leh vote an thlak ngei nana tanrualpuiah a sawm a; electoral roll-a chuang tur dik takte an tel a, tel lo turte thenfai a nih theih nana thuneitute tawiawm tlat turin a chah bawk a. Champhai District chhungah inthlanna muanawm tak neih a nih tawh thin dante tarlangin, heng zawng zawngte hi a mawhphurtu hrang hrangte inkara thawhhona tha tak chhawmnun zel a nih vang chauh a ni, a ti bawk.

He hunah hian Election Officer Pu Lalrinawma Khiangte hnen atangin State Election Commission thuchhuah bawhzuia Champhai Zion Veng VC By-election neih tura ruahmanna neihte ngaihthlak a ni. State Election Commission thuchhuah angin Mizorama khaw 17 ahte VC By-election neih tur a nih thu a sawi bawk.

Draft Electoral Roll tlangzarh hnu hian Election Branch-ah Village Level Officer (VLO) training neih chhunzawm a ni nghal bawk.

Vawiina Champhai Zion Veng VC By-election Draft Electoral Roll tlangzarhin a tarlan dan chuan tun dinhmunah Champhai Zion Vengah hian vote nei mi 836 an awm a; heng zinga 390 hi mipa niin, a dang 446 te chu hmeichhia an ni. In 264 awm mekin VC seat 5; General seat 4 leh Reserved seat 1 an nei thei a. VC member 1 Reserved seat atanga tling boral avangin he seat bik hnawhkhat tur hian inthlan buatsaih tur a ni a, BM Primary School chu Polling Station atana ruat a ni.

Ruahman dan chuan vawiin June ni 26, 2023 hian draft roll tlangzarh a ni a. Naktuk June ni 27, 2023 atanga July ni 11, 2023 thlengin thu thlen duh neite tan claims & objections period hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni ang a. July ni 17, 2023 thleng hian dilna lut leh siamthat tulte hearing kaltlanga chinfel vek hman tum a ni a. Champhai Zion Veng VC By-Election neih huna hman tur VC Electoral Roll thar ber chu July ni 18, 2023 hian tlangzarh tum a ni.

He hunah hian ERO/AERO, DIPRO, Zion Veng VLO, VC, Political party aiawhte, veng chhung NGO hotute leh Chanchinbumite an tel a ni.