912/2023-2024

Aizawl, the 26th June 2023 : Tukin khan Disaster Management and Rehabilitation Minister Pu Lalchamliana chuan Hunthar Veng a lei tla hniam siamthat mek chu a hmunah kalin, Public Works Department leh Disaster Management & Rehabilitation Department te hmalakna a en. Minister hi Aizawl North III Bialtu MLA Pu C. Lalmuanpuia'n a tawiawm a ni.

Minister Pu Lalchamliana chuan amah tawiawm tute chungah lawmthu sawiin, Hunthar lei tlahniam leh leimin avanga chhungkua engemaw zat re-locate ngai hial an awm chu pawi a tih thu leh, hemi hmun siamthat nan sawrkarin theihtawp a chhuahna kawngah khawtlang mipui tawiawmna a hlu a tih thu leh sawrkara thahnem ngai thawktute chungah lawmthu a sawi bawk a. Minister chuan helai lei tla hniam hi kum 1990 vel atangin zawi zawiin a che a, kum 2016 bawe chho khan sorkar hmasa hunlai in Disaster Management and Rehabilitation Department chuan Project a siam tawh thu a sawi a. Kum 2017 ah siamthatna a awm leh a, phai atangin technical mi te pawh lokal in hma engemaw chen chu lak a ni a. Kum 2018 ah Chief Minister Pu Zoramthanga'n hma la in, NDMA-ah amah ngei kal a, a zuk dawr hnuah Central lam mithiam technical mi pathum an lokal leh hnuah, NDMA in cheng vcb 20.8 lo sanction in, amaherawhchu centre state share 50:50 a inrem siam a nih hnuah, hna thawh a nih thu a sawi a. He lai hmun Top Soil a rih piahlamah luikawr lam atanga tawlh tawh a ni avangin thlanglam atanga dawm tel loh chuan chunglam ringawt chu a fel kan ringlo a, kawngpui NH-54 chunglam zawng chu Disaster Management and Rehabilitation department hmalakna in Pile foundation leh SDA sak te, drainage, retaining wall, shaft well siam leh adangte thawh a lo ni ta a. Kawng thlang lam zawng chu state sum hmangin PWD hmalakna in counterfort retaining wall siam hna thawh a ni a. Heng bakah hian Vaivakawn lui leh Biak In lui ah link drain siam tura hmalak a nih bakah tun dinhmun a tui hawk luanna (drain) siam belh ngai te siam belh a nih tur thu Home Minister hian a hmunah en in a sawi bawk a ni.

DMR Minister hi tukin hian PWD leh DMRD a hotute leh khawtlang hruaituten an tawiawm a ni.