65/2024-2025 

Champhai, the 5th April, 2024: General Election to Lok Sabha, 2024 atana inpuahchahna enfiaha Champhai District-a cham mek General Observer for 1-Mizoram (ST) Parliamentary Constituency Dr. Nipun Vinayak, IAS chuan vawiin khan ramri dep khua Zokhawthar a tlawh.

General Observer Dr. Nipun Vinayak chuan Zokhawthar khawtlang hruaitute a kawmnaah ramri dep khuate chu inthlanna muanawm, felfai leh langtlang tak kalpui a nih theih nana an pawimawh dante hrilhin, inthlanna tibahlah leh nghawng thei thilte do kawngah thuneitute tha taka thawhpui zel turin a chah a ni.

He hunah hian inthlanna muanawm leh felfai neih a nih theih nan ramri leh ramri dep khuate chu a bik taka vil uluk a pawimawh thu leh hemi tur hian thawhhona tha vawnnun zel a pawimawh thu tarlan a ni a. Election Official-te hmalakna bakah NGO te chuan Mizoram People's Forum (MPF) ruahmana inthlanna muanawm, felfai leh entawntlak siam a nih theih nana hma an lo lak tawh dante General Observer hnenah hian an thlen bawk.

General Observer Dr. Nipun Vinayak hian 24/20 Mualkawi Polling Station atana hman Govt. Primary School, Mualkawi leh 24/23 Zokhawthar II Polling Station atana hman Zokhawthar Secondary School-te a tlawh a. Polling Station atana tul hrang hrang leh awm ngei tura bituk Assured Minimum Facilities (AMF) hnuaia ngaihpawimawh Polling Station kalpawhna kawng, tui intur, power supply, inbiakpawhna signal, wheelchair luhna ramp, toilet, vote thlaktute intlarna leh luh chhuahna, bungraw mamawh bakah Polling Station hmunhmate a enfiah a ni.

Vawiin vek khan Dr. Nipun Vinayak chuan Assam Rifles COB Zokhawthar leh Integrated Check Post (ICP) Zokhawthar te pawh a tlawh bawk.

General Observer hi District Election Officer Pu James Lalrinchhana, SP Pu Vineet Kumar leh Official dangte'n an tawiawm a ni.