64/2024-2025 

Khawzawl, 5^th April 2024:  Election Commission of India chuan Lok Sabha Inthlanpui 2024-ah hian kum 85 chunglam leh vohbik (PwD) ten anmahni in lum ngei atanga vote an thlak theihna turin ruahmanna a siam a. Khawzawl District-ah pawh he hmalakna hi chak takin kalpui a niin, in lama vote thlakna hun hi April ni 8 leh 9, 2024 khian neih a ni dawn a. Vawiin khan Home Voting buaipuitu Polling Officials te tan Khawzawl DC Auditorium-ah training neih a ni.

Training-ah hian State Level Master Trainer Pi V. Lalmuanpuii, Project Director, DRDO; SDO (S) Pu Vabeimozachhi Chozah leh DIPRO Lalchhuanawma Ralte ten Home Voting kaihhnawih thil pawimawh hrang hrang sawifiahna hun hman a ni a. Polling Official-te hian MLA Inthlanpui-a an thil tawn tawh te sawi chhuakin, sawi hona hun tha tak neih a ni bawk.

Khawzawl District Administration hnuaia Assembly Segment awmchhun 22-Tuichang AS ah hian Home Voting dil mi 109 an awm a. Home Voting kalpui tur hian Polling Official te chu team 6-ah then an ni a, anni hian April ni 8 leh ni 9 khian kumu pa leh vohbikte chu an chenna inah kalchilhin vote an thlak tir ang.