63/2024-2025 

Kolasib dated 5th April 2024: Nimin chawhma khan DC Conference Hall, Kolasibah District Rural Development Agency Governing Body chuan thutkhawmna neiin Pu John LT Sanga, Deputy Commissioner, Chairman ni bawk chuan a kaihruai a. Pu Lalmuan Puia, Project Director, DRDO chuan DRDA thiah a ngaih nachhan leh DRDO hnuai a hna kalpui chhunzawm dan a tarlang a ni.

Chairman Pu John LT Sanga, Deputy Commissioner chuan District Rural Development Agency chu thingtlang lam a hmasawnna ruangam thlentu pawimawh tak a nih thu sawiin he agency kaltlang hian thingtlang lam a khawsak chawikanna tur Sawrkar laipui scheme engemaw zah kalpui a nih thu a sawi a. DRDA chu sawrkar laipuiin a chhunzawm tak loh avangin he hna pawimawh tak thawk chhunzawm tur hian September ni 17, 2022 atang khan District Rural Development Office din a nih thu a sawi.

Pu Lalmuan Puia, District Rural Development Officer chuan DRDA thiah a nih theih nana hmalakna hrang hrang kalpui a nih dan tarlangin thawktu awm dan te, ram, office building, Quarters leh lirthei dinhmun te chu ziak a thehluh a nih tawh thu a sawi. Inkaihruaina in a phut angin Governing Body member hmun 4 a then a hmun 3 tal pawmpuinain thiah theih a nih thu a sawi a. September ni 7, 2022-a Sawrkar thuchhuah angin district tin a DRDA-te chu DRDO a thlak vek an nih tawh thu a sawi bawk a ni.

DRDA Governing body ah hian Deputy Commissioner chu Chairman niin Project Director chu Member Secretary a ni a. District Lead Bank Officer, General Manager, NABARD, Branch Manager, MRB, District Development Manager, NABARD, General Manager, DIC, DVIO, KVIB, DPO, Social Welfare Department, President Sub-Headquarters YMA leh MHIP-te member an ni.