138/2023-2024

Champhai, the 18th April, 2023: Champhaia Home pathum; TNT Mazuia Memorial Home, Genesaret Gospel Home leh Grace Receivers'Home-te hnenah vawiin chawhnu khan Governor's Discretionary Grant kaltlangin tanpuina pawisafai Rs 25,000/- theuh hlan an ni. Tanpuina sumfai hi Bawrhsap Pu James Lalrinchhana chuan Mizoram Governor Pu Hari Babu Kambhampati aiawhin a hlan a ni.

Bawrhsap Pu James Lalrinchhana chuan Champhai District-a Home 3 ten Governor's Discretionary Grant kaltlanga tanpuina an dawng chu lawmawm tiin, District mipui aiawhin Governor chungah lawmthu a sawi a. Governor chuan mi harsa leh chhumchhiate a vei thu leh insurane scheme-te a ngaihpawimawh thu a sawi a. Society hlim ni turin chhungkua leh mimal kan dam tlan a ngai a, chumi tura inenkawlna leh chhawmdawlna hmun Champhaia tha tak tak kan nei hi a vanneihthlak a, an hnathawh leh rawngbawlnate tlawp chhunzawm zel ang u, tiin district mipuite a sawm a. District nuam, hrisel leh hlim siam turin kan zavaia tanrual a pawimawh a ni, a ti bawk.

He hun hi Pu M.Misael, Addl. DC Champhai chuan a kaihruai a. Pi V.Lalmuanpuii, SDO Sadar, Champhaiin hun hman a nih chhante a tarlang a. Home enkawltute atangin thusawi ngaihthlak a ni bawk a. An tarlan dan chuan tun dinhmunah TNT Champhaiah mi 345 leh thawktu 32 an awm mek a, Genesaret Gospel Home-ah mi 25 leh thawktu 10 an awm a, Grace Receivers' Home-ah mi 18 leh thawktu 5 an awm mek a ni.a