138/2023-2024

Champhai, the 18th April, 2023: Champhai khawpui kianga luang Keilungliah lui khuah enkawl kawnga mawhphur tura Sawrkarin a din, 'District Level Committee on Post Completion Management & Maintenance of Dam Reservoir cum Recreation Centre at Keilungliah' chu vawiin chawhnu dar 1 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Chairman Pu James Lalrinchhana chuan Keilungliah tuikhuah hawn fel a ni chu lawmawm a tih thu sawiin, lui khuah chu tui luangral mai tur dahkhawlna tha tak, a tul huna hman theih tura ruahman a nih tel thu a sawi a. Champhai nghahfak leh rohlu tak ni mahse dan leh thupekte zawm chung zela tangkai taka hman thiam a pawimawh thu a sawi a. Keilungliah tuikhuah enkawl kawngah infinchhuah zel a pawimawh thu sawiin, line department hrang hrangte leh khawtlang inkarah thawhhona tha chhawmnun zel a pawimawh thu a sawi bawk.

Vawiin thutkhawmah hian Keilungliah tuikhuah tlawhtute atanga luh man lak tlingkhawm tawh dante thlirlet niin, tuikhuah leh a chhehvel ram venhim kawnga pawimawhte leh Land Lease siam tura hmalak tulte sawiho a ni a. Lirthei lutchhuak khuahkhirh dan turte sawiho niin, tuikhuahna laia Lirthei lian kal tlang thinin tuikhuah himna a nghawng theih avangin LMV chunglam tana kal tlang phal loh nise an ti a; ruahhmanna siam dan turte sawihoin an pawm a. A tlawhtute tana lenkual velna tur Lawngleng (boat) service dah chungchang leh buh leh thlai chawm nana hman dan turte pawh ngaihtuahho a ni bawk a. Agriculture Department atanga thal thlai chawm nana tuilak dilna lut chu tuikhuah chhan zinga pawimawh tak pakhat a nih tel avangin zirchianna neih hnuah a tul anga hmalak tha tih a ni a; tuikhuaha tui awm dan, thlai chawm nana mamawh dan crop planning leh tul dangte zirchiang turin line department-te ruat an ni a. Keilungliah leh a chhehvela nungcha leh thingte humhalh tlat a nih avangin Committee chuan Sangha leh nungcha dang man lo tur te, a kama thingte tichereu lo turin mipuite a chah a; dan lova thil tite chungah a tul anga hmalak a nih tur thu a tarlang bawk.

Tuikhuah tlawhtute tana luh man ticketing system kalpui mek December ni 15, 2022 atanga kalpui tan, puitlingah Rs 20/-, naupangah Rs 10/- , two wheeler Rs 20/-, three wheeler Rs 30/- leh four wheeler Rs 50/- zela lak chu kalpui rih zel nise an ti a, heng bakah hian tuikhuah tlawhtu ni lo, tuikhuah paltlang thinte tan erawh luhtlang man luh man rate bithliah pangngai chanve a lak tha tih a ni bawk a. Tuikhuah tlawhtute leh mipuite hriattur inzirtirna leh danin a phallohte tarlanna siam nise an ti bawk a. Hmalak tul hrang hrangte, a enkawl leh buaipui kawnga mamawh ang zawng zawngte ngun taka ngaihtuaha zirchiang tur Sub-Committee siam niin, meeting leh hmasak berah report pe hman tura tih an ni a. Keilungliah tuikhuaha hnawmhnawk lut tur dan a nih theih nana gabion wall siam chungchang leh hmalak tawhnate ngaihthlak a ni bawk.

District Level Committee on Post Completion Management & Maintenance of Dam Reservoir cum Recreation Centre at Keilungliah, Champhai thutkhawm tum nganaah hian Executive Vice-Chairman Pu Thanchungnunga, SE, PHED Champhai WATSAN Circle; Member Secretary Pu Z.D Dengthuama, EE, PHED Champhai WATSAN Division, Member dangte leh sawm bikte an tel a ni.