139/2023-2024

Lunglei 18th April, 2023 : Vawiin khan HPC Cup vawi 12na Inter-village football tournament kharna hun C. Thuamluaia mualah hman a ni a, Agriculture Minister Pu C. Lalrinsanga chuan khuallian niin a hmanpui.

He hun hi Lunglei District Football Association President Pu PC. Lalramnghaka'n a kaihruai a, khuallian Pu C. Lalrinsanga chuan thu sawiin tunlaiah thalai tam tak ruihhloin a tibuai a, chumi laka thalaite fihlimna kawng tha ber chu infiamna a ni, a ti a. HPC Cup thil tum pawh chumi chu niin he tournament kaltlang hian thalai eizawnna nei ta pawh an awm nual tawh a, thalai engemawzat in he intihsiakna tuipui a a tihlawhtlingtu an ni thin chu lawmawm a tih thu sawiin sawrkar pawhin infiamna leh a hmanrua leh a hmasawnna ruhrel atan theihtawp a chhuah mek zel tih a sawi a ni.

Infiamna kawng hrang hrang 11 ah zanin hian sawrkar chuan lawmman incentive cash award a sem dawn a, sport lamah hmasawnna tur tam tak a awm a, thalai ten uar zawka eizawnna tling thei tura theihtawp chhuah a tul thu a sawi a ni.

Khual zahawm HPC Vice Chairman Pu Lawmawma Tochhawng pawhin thu sawiin HPC Cup chu thalaite hmasawnna atana duan a nih thu leh veng leh khaw hrang hranga infiammi ten hmalam pan nana hmang tangkai tura a duh thu a sawi a ni.

HPC Cup vawi 12na ah hian VC Team 36 an chhuak a, vawiin khan Serkawn VC team leh Electric veng VC team ten Final an khel a ni.