1069/2023-2024
Champhai, the 7th July, 2023: District Disaster Management Authority (DDMA), Champhai buatsaihin vawiin khan chhiatrupna thlen thulha midangte pui thuai tur leh chhiatrupna tawkte thian tia vuah Aapda Mitra Volunteer, Quick Response Team (QRT) hnuaia thawk turte tan DC Conference Hall-ah intuaitharna refresher programme buatsaih a ni. He hun hi Champhai District Bawrhsap Pu James Lalrinchhana, Chairman, DDMA Champhai District chuan khuallian niin a hmanpui a ni.
Khuallian District Bawrhsap Pu James Lalrinchhana chuan thalai rual Aapda Mitra Volunteer, chhiatrupna thlen thulha che chhuak mai thei tur Quick Response Team hnuaia awm turte tana intuaitharna refrehser programme buatsaih a ni thei chu lawmawm a tih thu sawiin, Quick Response Team-te chu zu leh ruihhlo laka fihlim mai bakah physical leh mental fitness ngaipawimawh turin a chah a. DDMA Chairman chuan Disaster Plan duan fel a nih tawh thu sawiin, QRT te chu lo zirchiang tur leh chhiatna thlen thulha koh mai theiha awm reng turin a chah a. Kalkhawmte chu Champhai District mipuite himna tur leh hmasawn zelna kawnga rilru seng turin a fuih a, rawtna an neihte District Official-te hnena thlen zel turin a sawm a ni.
He hun hi DM&R Nodal Officer Dr. Vanlalnunpuii Ralte, SDC chuan kaihruaiin Pu F.Lalchhandama, Station Officer, F&ES, Champhai Station-in kang thelh dan chungchang zirtirna a pe a. Pu C.Hmingthantluanga, ASI, Traffic Cell, Champhai Police Station-in mipui leh lirthei veivak thunun kawnga tulte a zirtir a. Dr. Lalnuntluanga, Medical Officer, District Hospital Champhaiin First Aid chungchang zirtirna a pe a. Pu VL Hruaimawia, District Organizer, DM&R/DDMA, Champhaiin QRT awmzia leh mawhphurhnate, chhiatna thlen thulha hmalak dan tur chungchangte a zirtir bawk.
