1068/2023-2024

Mamit 7th July, 2023 : Govt. Employee Group 'D' Association Mizoram te'n an Rising Day Vawi 70-na chu vawiin khan I&PR Conference Hall, Mamit-ah lawm a ni a. Pu V.L. Remliana, Mamit District Bawrhsap chuan khuallian niin he hun hi a hmanpui.

Khuallian chuan Sawrkar inrelbawlna danah a bul thut atanga a ler thlengin pawimawh lo kan awm lova, kan hna chelh theuhte rinawm leh taima taka kan thawh hi a zahawm a ni a ti. Office-a awlthawng leh inthlahdahte chu an nunin a chhiat phah thin a, phur leh taima taka hna thawk turin Mamit District chhunga Group D te a chah.

District Bawrhsap chuan Group D dinhmun chu sawrkar hna inkailawn danah a hnuaihnung deuh angin lang mahse kan dinhmun chang pha lo tam tak an awm a ni tih inhria a, Sawrkar dan leh dunte kan hriat a, sawrkar mi kan nih angin Politics thilah te kan inhnamhnawih tur a ni lova, dikna leh rinawmna vawng nung zel turin a chah bawk a ni.

He hun khualzahawm ni-a hmanpuitu Pu Zothanpuia, President, Mizoram State Group 'D' Govt. Employees Association, Gen. Hqrs, Aizawl chuan Mamit Group 'D' te'n Kum 70-na Rising Day hial hmang theia pawl inpumkhat an ni chu lawmawm a tih thu sawiin hruaitute chungah leh Mamit District Bawrhsap chungah lawmthu a sawi a. Pawl tana theihtawpchhuah tur leh harsatna tawk an awm anih pawha intanpui tawn zel turin a chah a. Mahni nihna haia hna thawk lo tur leh kan dikna chanvote huaisen taka kengkawh chunga Sawrkar tana rinawm taka hnathawk turin a chah a ni.

Vawiin hun hi hun hnihah then niin chawhma hun hi Pu Hmangaihzuala, President, Dist. Hqrs, Mamit chuan a kaihruai a. Pu H. Lalrosangliana, Vice President, Dist. Hqrs. Mamit chuan chawhnu hun kaihruaiin Pu K. Lalrinmawia, Gen. Hqrs. Secretary, Aizawl hnen atangin Report ngaihthlak a ni bawk.

He hunah hian Group 'D' Association General Hqrs. hruaitute leh Mamit lama Group 'D' hruaitute atangin thu sawi tha tak tak ngaihthlak a ni a. An member boralte sunna hun hman anih bakah zawhna leh chhanna hun hman nghal a ni bawk.

Rising Day lawmna pual hian tlai lamah ruai kilho a ni bawk a ni.