4150/2023-2024

Champhai, the 13th March, 2024: General Election to Lok Sabha, 2024 atana inpuahchahna kalpui mek zelah vawiin chawhnu dar 2:00 khan District Election Office, Champhai buatsaihin election kaihhnawih senso hrang hrang hman dan viltu, election expenditure monitoring hnuaia peng hrang hrang Assistant Expenditure Observer (AEO), Accounting Team (AT) leh Video Viewing Team (VVT) te pualin DC Conference Hall-ah training neih a ni.

He hun hmanpuitu Pu James Lalrinchhana, District Election Officer chuan a hunlai zela awmte'n mawhphurhna tha taka an hlen thin avangin Champhai District-ah inthlanna muanawm, felfai leh langtlang tak neih a lo ni tawh thin tih sawiin, ngaihthahna avangin chetsualna a thleng thei tih hriaa training atanga tha taka bultan tum turin kalkhawmte a fuih a. Election expenditure monitoring chu election laimu pawimawh tak, a bultantu leh hnukhartu a nih thu tarlangin, hemi hnuaia team hrang hrang member-te chu taimakna leh fimkhurna dah pawimawh hmasa ber turin a fuih bawk.

MLA Inthlanpui 2023 ah Election Expenditure Monitoring kaltlanga hmalaknaah harsatna lian tham awm lova tha taka mawhphurhnate hlenchhuah a ni chu fakawm a ti a. Member-te chu inthlan kaihhnawih buaipui kawngah hah thin hle mahse mawhphurhna an neihte taka hlen chhuah tum turin a chah a. Harsatna awm lova inthlan an hmachhawn theih nan taksa leh rilru hriselna ngaipawimawh theuh turin a chah nghal bawk.

Thusawitu dang Pu K. Zorammuana, Dy. DEO/Addl. DC Champhai chuan Lok Sabha inthlanpui neih tur atana inpuahchahna tha tak Champhai District-ah kalpui chhoh mek zel a ni chu lawmawm tiin, kalkhawmte chu an hriat lohte zawh hreh lo turin a chah a ni.

Vawiin training hi Pu Benjamin Zalawma Ralte, Election Officer, Champhai chuan a kaihruai a. Pu Lalrinawma, PD, DRDO Champhai, Nodal Officer (Expenditure Monitoring Cell) in Election Expenditure Monitoring hnuaia team hrang hrang Assistant Expenditure Observer (AEO), Accounting Team (AT) leh Video Viewing Team (VVT) te kalphung leh hmalak dante a sawifiah a. Dr. Lallawmkima, DIPRO Champhaiin MCMC chungchanga expenditure monitoring kaihhnawih pawimawhte a sawi bawk.

General Election to Lok Sabha, 2024 atan hian Election Expenditure Monitoring kalpui turin Champhai District-ah Assistant Expenditure Observer 3, Accounting Team 3 leh Video Viewing Team 3 an awm dawn a. Hengte hian District chhunga Assembly Constituency 3; 23-Champhai North A/C, 24-Champhai South A/C leh 25-East Tuipui A/C te a hranpa theuhin an vil dawn a ni.