4149/2023-2024

2024 Vau thla ni 13: Urban Development & Poverty Alleviation (UD&PA) Department hnuaia Kolasib City Mission Management Unit (CMMU) huaihawtin Kolasib Venglai Bazar chungah ni thum awh tur Deendayal Antyodaya Yojana-National Urban Livelihoods Mission (DAY-NULM) Festival, 2024 Exhibition cum Food Fest buatsaih a ni a. Vawiin khan Kolasib District Bawrhsap Pu John LT Sanga chuan Khuallian niin a hawng.

Khuallian Pu John LT Sanga chuan sawrkar laipuiin khawpuia cheng mi retheite'n ei zawnna ngelnghet an neih theih nan ruahmanna ṭha tak tak a duang tih sawiin, khawpuia cheng mi retheite tana sum hai luhna kawngah DAY-NULM hnuaiah kawng ṭha tak a awm tih a sawi a. Mihringte hi a mala khawsa thei kan ni lo va, chhungkua leh pawl anga ṭang ruala hma sawn tura ke pen a ngai a ni tiin, chumi atan chuan self help group (SHG) hma lakna chu thil ṭangkai leh zawngchhangthlak tak a ni, a ti a. A mihring tam lam aiin a awm chhunte sum tlem te te thawh khawm aṭanga intun din chu SHG-in a tum a nih thu sawiin, SHG-te chu an hma laknaah theih tawp chhuah a, hlawhtlin tum ngei turin a chah a ni.

Khuallian chuan group ang chauh ni lovin, mimal ang pawhin tihtak zet leh taima taka hna thawh a pawimawh thu a sawi a. Mizoram ram leilung ṭhatna chu ei leh bara intodelhna leh ram tana innghahna thama hman ṭangkai dan kawng zawn a ṭul tiin, thlai leh thei chi hrang hrang chin kawnga hma la thar turin kal khawmte chu a chah a ni.

DAY-NULM Festival, 2024 hawnna hun hi Kolasib District Urban Development Officer (DUDO) Pi Christina Lalmuanzuali chuan a kaihruai a. Pu Zothanmawia Hrahsel, Manager SD-I, DAY-NLUM, Kolasib chuan report a pe a. DAY-NULM hi khawpuia cheng mi rethei leh harsate chawi kanna tur atana Ministry of Housing & Poverty Alleviation flagship programme pawimawh ber pakhat a nih thu a sawi a. DAY-NULM thil tum hrang hrang leh NULM-in a ken tel hrang hrangte tar langin, UD&PA hnuaiah Kolasib District-ah self help group 34 an awm mek thu a tar lang bawk.

DAY-NULM Festival, 2024 Exhibition cum Food Fest hi March ni 15, 2024 (Zirtawpni) thlengin hawn a ni dawn a. He Festival-ah hian self help group 25 te'n an thil siam chhuah leh thar chhuah chi hrang hrangte mipui tana en theih leh lei theih turin an pho chhuak a ni.