4775/2024-2025

Champhai, 24th March 2025: Vawiin khan Mizoram sawrkar flagship programme ‘Bana Kaih’ hnuaia Champhai District chhunga Progress Partner-te tan Circuit House Conference Hall-ah Orientation Training buatsaih a ni a. Champhai Bawrhsap Pu Mohammad Aaquib chuan he hun hi hmanpuiin, Progress Partner-te hnenah hian Progress Partner a thlanna certificate a hlan nghal a ni.

Orientation Training hmanpuitu Pu Mohammad Aaquib chuan Progress Partner ni tura thlanchhuahte chuan theihna sang tak an nei a ni tih a rin tlan thu sawiin, Bana Kaih hnuaiah hmasawnna kawng zawh hova, thawhhona ṭha neih puiah a sawm a. Harsatna an neih te chingfel turin line department te an inpeih reng a ni, a ti. 

Orientation Training-ah hian Pi Lalrinchhani, DHO chuan Bana Kaih Scheme kalhmang inhrilhfiahna hun a hmang a. He scheme hmang hian Mizoram sawrkar chuan sawrkar laipuiin ram changkang a India hlankai a tumna kawngah tha thawh ve a, hmasawnna tluantling leh tlo neih a tum a ni, a ti a. Progress Partner-te chu mawhphurhna sang tak nei,  hmasawnna thlen tura sawrkar thawhpuite an nih angin a thlawna thil dawn a, run dal a hmalak mai mai tum chi a ni lo tih hre reng turin a chah bawk. 

Pu Lawmkima, Lead District Manager chuan he hunah hian Mizoram sawrkarin Bana Kaih hnuaia a thawhpui Bank - SBI, MRB leh MCAB kaltlanga loan/scheme hrang hrang lak theih- PMEGP, PMMY (Mudra Loan), KCC leh Stand Up India te sawifiahna hun a hmang a. Loan a hun taka rul te tan scheme hnuaia ruahmanna awm sa bakah Mizoram sawrkarin a pung rulh sak turin ruahmanna a siam thu a tarlang a ni. 

Pu Ramnundanga, Asst. Professor, Govt. Champhai College chuan he hunah hian Progress Partner te tan Accounts vawn dan tlangpui a sawifiah bawk a ni.

He hun hi Pu Ngulzaṭhuama, SDO (Sadar) chuan a kaihruai a. Champhai District chhunga Progress Partner tura thlan chhuah mi 44 te he hunah hian an tel. Progress Partner te hi Line Department hrang hrang 8 hnuaia mi an ni a; AH& Vety Department hnuaiah mi 21, Agriculture Department hnuaiah mi 5, Horticulture Department hnuaiah mi mi 7, Fisheries Department hnuaiah mi 2, LESDE hnuaiah mi 4, Tourism hnuaiah mi 3 bakah UD&PA Department leh I&PR Department hnuaiah mi 1 ve ve Progress Partner an awm a ni.