4774/2024-2025

Dated AIzawl: the 24th March 2025 : Vawiin chhun dar 12:00 khan, Khawvel puma tui hlutna inzirtirna ni (World Water Day 2025) chu PHE Department leh Central Young Mizo Association (CYMA) tangkawp bultumin, kumin World Water Day thupui "Glacier Preservation" hmangin Vanapa Hall, Aizawlah hman a ni a. He hun hi Prof. Lalnilawma Hon'ble Minister, PHED chuan khuallian nia hmanpuiin, he ni puala intihsiakna lawmman a sem nghal bawk a ni.

He hunah hian khuallian Minister Prof. Lalnilawma chuan thusawiin, sik leh sa inthlak danglam nasain min nghawng dante, tui pawimawhna leh tuihna humhalh inzirtirna puala ni bik, World Water Day hman a ni chu lawmawm a tih thute a sawi a. Minister chuan Mizoram hmun hrang hrangah tuihna humhalh tura Department hmalaknate tarlangin, PHED hnuaia Village WATSAN Committee te puihnain thingtlang khaw tinah hmalakna kalpui thin a nih dante, chumi hrulah chuan mahni khaw tui lakna hnar ramngaw humhalha, khawih chet phalloh tura khawtlang tana mimal ram pek pawh chhinchhiah danin Mizopa chhiara tin 65 leh a chanve lai a nih thu a sawi a. Ram kang vanga Mizoramin a tawrh nasat ziate tarlangin, kalkhawmte chu tuihna humhalh a kangmei laka ramngaw venhim kawngah chuan theihtawp chhuah zel turin a chah nghal bawk a ni.

World Water Day puala hun hman hi Pi Teresy Vanlalhruaii, Secretary, PHED chuan kaihruaiin kal khawmte lo lawmna thu a sawi a. Prof. Lalnuntluanga, Vice President, Central YMA chuan thupui sawizauna neiin, Pu Lalhmachhuana, President, CYMA leh Er. H. Duhkima, E&C PHE Department pawhin thutawi an sawi bawk a. he ni puala intihsiakna hrang hrang, reels insiamsiak, hlahril (poetry) inphuahsiak leh online slogan competition lawmman semna hun hman chhunzawm nghal niin, Er. Lalropuia, Director, Project Management Unit, PHED chuan lawmthu sawiin hun hi a khar a ni.

World Water Day hi kumtinin March ni 22 ah khawvel pum huapa urhsun taka hman thin a ni a, kumin hian remchan zawkna vangin March ni 24 a hman a ni a. He ni pual hian Mizoram hmun hrang hrangah talk show hmanga inzirtirna leh mahni khaw tui lakna hmun thenfai hnatlangte neia hun hman a ni.