4773/2024-2025

Saitual, the 24th March 2025: Vawiin chawhma dar 11:00  khan DC Conference Room, Saitualah District Hospital RKS Governing Body thutkhawmna neih a ni a, meeting hi Chairman, District Bawrhsap ni bawk Dr. Lalngura Tlau chuan kaihhruaiin drugs canteen nghaktu thlan leh RKS Executive meeting proposal te thlirho a ni. 

He hunah hian Chairman Dr. Lalngura Tlau chuan kalkhawmte hnenah lawmthu a sawi a, damdawi in lama thawktute inpekna zarah damdawi in fai leh hmasawnna hmel thar tam tak hmuh niin, Saitual District Hospital chuan Mizoram pum huap pawha damdawi in fai inelna lawmman an la thei chu chu fak an phu hle a ni, a ti. Bawrhsap chuan damdawi ina thawktute chu mipuite tana rawngbawltu pawimawh tak an nihna hre thar tur leh damlote lakah hawihawmna lantir zel turin a chah bawk.   

Vawiin thutkhawmah hian Drugs canteen nghaktu thlan fel niin tender chhuah atangin mi pakhatin a chhang a ni. Canteen luah man hi thla khatah Rs 12000/- niin luah hun chhung atan kum 3 ni se tih a ni.    

Dr. Zothanpari Chhakchhuak,Sr. MO & Member Secretary hnen atangin RSK Account (April 2024- 15th March 2025) Financial Report leh poor fund hman dante ngaihthlak a ni a, RKS executive committee thurel sawifiahna leh rawtna awmte a thlen nghal bawk. Heng bakah hian registration Counter/ABHA cum P&SM Instructor Room sak rawtnate, help desk ruahman zui dan turte, Dy. CMO leh Doctor Quarter panna blacktopping dan tur chungchangte, Hospital atanga CMO Office panna step siam dan tur te ngaihtuahho a ni a. Hospital Achievements pawh thlirho nghal niin, hetiang hian achievement hi tarlan a ni ( April 2024 – Feb 2025) : OPD – 14709, IPD – 1175, Emergency – 4340, Delivery – 118, Death – 38, Infant Death – 1, Minor Surgery – 162.  

Vawiin thutkhawmah hian Dr V.Lalremruata, Dy CMO, Dr. Zothanpari Chhakchhuak, Sr. MO& Member Secretary, Pu Micky Lalenkawla, DEO, Pu Lalzuala, SDO, PHED, Pi Zodingpuii, DIPRO te leh line department aiawhte bakah NGO hrang hrang aiawhte an tel a ni.