4772/2024-2025

Kolasib Dated 24th March, 2025: Vawiin chawhma dar 11:00 khan I&PR Conference Hall, Kolasibah Chief Medical Officer (CMO) buatsaihin World TB Day-2025 “Yes! We Can End TB: Commit, Invest, Deliver” tih thupui hmangin neih a ni a. He hun hi Kolasib Bawrhsap Pu Robert C. Lalhmangaiha chuan khuallian niin a hmanpui.

National Rural Health Mission hnuaia National Tuberculosis Elimination Programme kaltlangin Tuberculosis ‘Ngawr Natna’ um bo a nih theih nan Sawrkar laipui chuan theihtawp a chhuah a. hemi Programme denchhana Kolasiba World TB Day hmanna Senior Chief Medical Officer(Sr. CMO) Dr. RK. Lalthlamuanna kaihhruaina ah hian khuallian Kolasib Bawrhsap Pu Robert C. Lalhmangaiha chuan he hun hmang tura lo kal zawng zawngte chungah lawmthu sawiin, mipui hrilsena kawnga hmalatu District TB Centre leh Health & Wellness Centre a thawktute chu an fakawm a tih thu a sawi a. World TB Day 2025 District huapa Programme hman a ni leh theih chu lawmawm a tih thu sawiin, India ramin TB natna umbo tumin chak taka hma a lak thu  Kolasib Bawhrsap chuan a sawi a, amaherawhchu he natna dona kawngah hmasawnna thui tak thleng tawh mah ila, umbo a nih theih nan Sawrkar hmalakna mipuite’n kan thlawp that a tul thu sawiin, TB natna umbo a nih theih nan District Administration, NGO, Village Council-te leh Kohhran thlengin inzirtirna kalpui that a pawimawh thu a sawi a ni.

Kolasib Bawrhsap chuan Mizoramin TB natna kan hmelhriat tan kum chu 1930 atanga 1940 bawr chho vel a nih thu sawiin, damdawi a la awm that loh avangin he natna veite’n an thihpui nasat thin thu a sawiin chung zingah chuan kan mi hmasa thu-leh-hla lama thawhhlawk tak takte pawh an tel thu a tarlang a. Amaherawhchu, tun dinhmunah chuan TB natna enkawlna kawngah damdawi thate kan neih tawh avang leh Damdawi In lama thawktute inpekna zarah nasa takin nunna pawh kan chhan hnem hle a ni, a ti . He natna umbo tura Sawrkar hmalakna pawh a hlawhtlin theih ngei nan mipuite’n tihtur kan neih thu sawiin, he natna nei inringhlelte chuan District TB Centre leh Health & Wellness Centre te pan thin turin kalkhawmte a chah bawk.

Kolasiba World TB Day hmanna ah hian Pu RL Lalnunkima, Senior Treatment Supervisor chuan TB natna umbo tura hma lo lak tawh dan -  Performance Report a pe a. Tun dinhmunah Kolasib District chhungah TB vei enkawl mek mi 95 awm in, chung zinga mi 59 te chu Chuap TB niin a dang mi 36 te chu Chuap pawm lam TB natna veite an nih thu a tarlang. 

Hemi hunah hian Kolasib District chhunga TB umbona kawnga Village Council thawkthate hnenah lawmman ‘Mitra Felicitation’ leh thuziak hlanna hun neih a ni a. Kum 1 chhung Free TB Village ni thei VC 17 te hnenah ‘Bronze Mitra’ leh Kum 2 chhung Free TB Village ni thei VC 11 te tan ‘Silver Mitra’ siam a ni a. Khullian Pu Robert C. Lalhmangaiha chuan heng lawmmante hi semchhuahna hun a hmang a ni. 

Lawmman dawngtute hi a hnuaia tarlante hi anni :

Bronze Mitra dawngtu Village Council(VC)-te : Kolasib Project Veng, Gosen Veng, Bukvannei, North Thinglian, Bairabi South, Bilkhawthlir-‘S’, Vairengte-IV, Phainuam, Lungdai, Nisapui, Lungmuat, N. Hlimen, Hortoki, Kawnpui-I, Kawnpui-III, Kawnpui Venglai.  

Silver Mitra dawngtu Village Council(VC)-te : Saihapui ‘K’, Pangbalkawn, Meidum, N. Chawnpui, Saiphai, Saipum, Serkhan, N. Chaltlang-I, N. Chaltlang-II, Bukpui leh Thingthelh te an ni.