4771/2024-2025

Siaha the 24th March 2025: Vawiin chawhma dar 11 khan District Hospital Siaha (DHS) Hall, Siaha-ah World TB day, 2025 lawmna leh kum hnih chhunga TB vei awm lohna khua 18 te chawimawina leh lawmpuina hun hman a ni a, Pu Abraham Beirazi Khithie, Additional DC chuan khuallian niin he hun hi a hmanpui.

Dr C. Lalrosanga, DMS, Siaha chuan he hun hi kaihruaiin kalkhawmte lawmna thu a sawi a, kumin atana thupui thlanchhuah ‘Yes, We can end TB: Commit, Invest, Deliver’ sawifiahna neiin ‘Mipui te’n kan tum tak tak a, kan tanrual chuan TB natna inkaidarh zel tur hi kan titawp thei a, amaherawhchu chumi tur chuan inpekna leh tihtak takna nena tha thlah lova kan tanrual a ngai a ni’ a ni.

Khuallian Pu Abraham Beirazi Khithie, chuan sawrkar laipui leh Prime Minister Pu Narendra Modi hmalaknain India ram atanga TB umbo beihpui thlakna kal zelah ‘End TB by 2025’ chu chak taka kalpui mek a ni a, tun dinhmunah khawvel pumah India chu TB vei tamna ber ni mah sela hmathlir thui tak nena ram hruaitute hmalakna chu mipuiin kan thlawp that chuan rah tha tak a chhuah ngei ngei ang tih a rinawm a tih thu sawiin, World Health Organisation pawhin khawvel atangin TB chu kum 2023-ah chuan umbo an tum thu a sawi bawk.

Pu Abraham Beirazi Khithie chuan TB hmuhchhuah leh enkawlna chu sawrkarin a thlawnin kalpui mahse TB vei chu ei leh in tur tha nena inenkawl angaih avangin chhungkaw sum leh pai lakluh leh hmanchhuahah nghawng nasa tak a nei thei a, chuvangin invenna leh thehdarh theihna lakah tun aia fimkhur a tul thu sawiin department mal hmalak theihna anih loh avangin khawtlang hruaitute, NGO leh department hrang hrang lungrual taka thawhho a tul a tih thu a sawi bawk a ni.

Dr Lalnunziri, Sr. CMO pawhin thu sawiin tun dinhmunah Siaha district-ah TB damlo enkawl mek mi 76 awmin MDR TB mi 1 a awm a, TB veite’n ei leh in tur tha an neih theih nan department angin chak taka hma lak a ni a, tun dinhmunah Siaha leh Tuipang bialtu MLA bakah MADC a EM ten pawisa thahnem tak an thawh a, tlawmngai pawl leh mimal thahnemngai pawhin sum an thawh thin thu sawiin, pawisa tlingkhawm atangin department lamin ei leh in tur hrisel tak tak an leisak chu rualkhai takin damlote hnenah sem thin a ni tih a tarlang a, vawiin hun hmannaah pawh MCHP General Headquarters chuan damlote ei leh in tur lei nan pawisa fai cheng 2,000/- Sr. CMO hnenah an hlan nghal a ni a ti.

Siaha district chhungah kum 2 chhung TB vei awm lohna khua 18 a awm thu Sr. CMO chuan sawiin, anmahni lawmpuina leh thilpek hlanna hi Pu Lalrammuana, DPPM-in kaihruaiin khuallian Pu Abraham Beirazi Khithie, Dr C. Lalrosanga, DMS, Siaha leh Pi P Chaki, President MCHP, General Headquarters te chuan lawmpuina thilpek an hlan a ni. Kum 2 chhunga TB vei awm lohna khuate chu:-
1) Amobyu ‘B
2) Lobo
3) Tisopi
4) Riasikah
5) Thosai
6) Tuipi Ferry
7) Siata
8) Tipa ‘B’
9) Ahmypi
10) Bymari
11) Kiasie
12) Khaikhy
13) Lodaw
14) Miepu
15) New Laty
16) New Saikao
17) Siatlai
18) Tisi te an ni.

Pu CH Beikhochhi, STS chuan Siaha district TB dinhmun tlangpui report a pe a, Pu H Lairosiama, DPS chuan lawmthu sawiina neiin vawiin hun chu tihtawp a ni.