3859/2023-2024

16th February, 2024 : Vawiin khan Champhai-a Chapchar Kut 2024 hman dan tur relin Organising Committee  Pu James Lalrinchhana DC Champhai hovin thukhawm.

Pu James Lalrinchhana chuan Chapchar Kut hlim leh lawm taka mipui ten kan hman theih nan a huaihawttute'n rilru inhawng leh tihtak zeta ngaihtuah a pawimawh thu a sawi a. State level-ah Chief Minister kaihhruaina hnuaiah hman dan tur rel niin District tinah pawh he hun hi hmang tura tih kan ni, a ti a. Mizo culture vawnhim nan te, thangthar ten Mizo nunphung an hriat theih nan te, kan hnam rohlu chawisan a, chhawm nun zel a nih theih nan te Chapchar Kut hi a pawimawh takzet a ni, a ti.

Thu khawm chuan Chapchar Kut 2024 hmanna tura thil ṭul hrang hrangte sawi ho niin programme chipchiar duangtu tur atan Programme Sub-Committee din a ni bawk a. Power supply, tui in tur, medical leh sanitation te pawh a buaipui turte tihfel nghal ni bawkin venhimna hna thawktu District Police  puibawm  turin YMA te ruat ni se tiin an rel.

Kumin Chapchar Kut hi March ni 1, 2024 (Zirtawpni) chawhma dar 10:30 ah tanin, Zotlang Sports Stadium-ah hman ni se tiin Committee chuan a rel a. Champhai DC chu Kut Thlengtu tur niin, Kut Pa atan Er. H Ginzalala (Laltea) Champhai North Bialtu MLA chu sawm ni se tiin an rel.

Chapchar Kut ah hian mipui nawlpui tel theihna tur Mizo infiamna chi hrang hrang te, Mizo hnam lam chi hrang hrang thlir tur leh zaithiamte zai ngaihthlak tur a awm dawn a. Organising Committee chuan Chapchar Kutah hian mipui a tam thei ang ber tel turin a sawm a ni.

Vawiina Chapchar Kut Organising Committee- thutkhawmah hian sawrkar department hrang hrang hotute, Sub-Headquarters YMA, Sub-Headquarters MHIP, District Headquarters MUP leh District MJA aiawhte an tel ani.