Vawiin chawhma khan Pu Liansangzuala Chhakchhuak, Addl. DC Champhai kaihhruainain Republic of Myanmar Chin State Chief Minister-in Zokhawthar a rawn tlawh tur chungchangah meeting neih a ni.  

DC Conference Hall, Keifangtlang, Champhaia Meeting neihah hian Chin State Chief Minister lo dawnsawn dan tur leh hmunhma lo puahchah lawka programme neihpui dan turte sawiho a ni a. Department kaihhnawihte lo inhmakhua theihna turin ruahmannnate siam a ni a. Meeting chuan hun tepter tak karah inbuatsaihna kalpui  nimahse India leh Myanmar ram inlaichinna tihngheh deuh deuh anih theihna tura theihtawp chhuaha thiam ang tawka lo dawnsawn tum nise a ti a. Land Custom Station Hall, Zokhawtharah inkawmna hun tawi buatsaih tum a  ni.

Ruahman dan chuan Pu Salai Lian Luai, Chief Minister, Chin State Myanmar chuan August Ni 8, Zing dar 8:30 hian Rih-Zokhawthar Border kanin India ram a rawn lut dawn a. Hei hi tunhnaia sawrkar laipui leh Myanmar sawrkar inremna ziah ‘Agreement on Land Border Crossing with Myanmar’ tihhlawhtlinna leh a taka entirna tur a ni dawn a. India sawrkar aiawhin Commmerce and Industries Minister Pu H.Rohluna hovin lo hmuah tum niin, inkawmna hunte siam tum a ni a, hemi hnu hian Myanmar lamah a let leh dawn a ni.

India leh Myanmar Sawrkarin tunhnaia ramri kana inkalpawhna kawnga inremna an siam ang chuan Zokhawthar khua hi India, Myanmar leh ram dang passport leh Visa dik tak neite tana luh leh chhuahna hmun International Point atana ruat a ni a. Ramri kana Chin State Chief Minister rawn kal tur pawh hi Myanmar sawrkarin inremna a ngaihpawimawh leh lak thu tak zia lantirna a ni a. Dan ang taka India leh Myanmar ram intlawhpawhtawnna tura kawhhmuhna leh bultanna tur atana he programme hi siam a ni.

Vawiin Meeting-ah hian a kaihhnawih sawrkar department lama hotute, NGO leh Zokhawthar khawtlang hruaitute an tel a ni.