Vawiin chawhma khan DC Conference Hall, Keifangtlang Champhaiah Civil Services Day-2018 hman a ni a. He hun Champhai Bawrhsap Pu Vanlalngaihsaka kaihhruaiah hian Champhai khawpui chhunga Sawrkar Department hotute an tel a ni.
District Bawrhsap Pu Vanlalngaihsaka chuan sawrkar hnathawh chu mipuite tana rawngbawlna a ni tih hriat thar leh a tul thu a sawi a. Kan thawh sak mipuite tana hnathawh hi kan tihmakmawh a ni a, insiamthara inpe thar leh thin turin Officer-te chu a chah a. Sawrkar programme siam reng rengte chuan mipui a thleng phak tur a ni a, chumi tur chuan department zawng zawngte thawhhona tha a pawimawh a ni, a ti a. Civil Services Day hman tan anih dan tlangpui a sawi a. He ni pual hian Sawrkar programme tihlawhtling tha District thlanchhuahte hnenah lawmman pek anih thin thu sawiin, nikum lamah Siaha District chuan North East State pariat leh Hill State dangte inelna Category bikah lawmman a dawn thu a sawi a. Thawhhona tha tak avangin Mizoramah Champhai District chu pawn lera inthiar awmlohna, ODF District hmasa ber leh India rama 82-na hial a ni chu chhuanawm a tih thu a sawi a. Sawrkar prograame dangah pawh India rama langphak ni tur chuan Department hrang hrangte zingah thawhhona tha a awm angai a, nodal department kutah chauh tla bik loina theihna laiah Department dangte nena thawhho zel a ngai a ni, a ti a. Sawrkar hnathawkte chu heni pual hian inhlanthara, sawrkarin a rawih chhan mipuite tana thahnemngai taka rawngbawl tur leh vawiin mai nilova an service chhunga thutiam vawng zel turin a chah nghal bawk a ni.
Vawiin hian Department thenkhatin an hnthawh tlangpuite report an pe a. Health & Family Welfare Department hmalaknain Measles- Rubella Vaccination Campaign April Ni 18 atang khan ngawrh taka kalpui mek a ni a. District chhunga naupang thla 9 atanga kum 15 hnuai lam mi 40,511 te chu ni 30 chhunga pek vek tum a ni a. Ruantlang khua chu nikum December ni 15 khan Tobacco Free Village a puan a ni a. Damdawi In fai inelna Kayakalp 2017-ah Biate CHC chuan Mizorama fai ber lawmman a la a, District Hospital bik inelnaah Champhai Distritct Hospital chu State pumah 3-na a ni. Heng bakah hian District level inelna siam a ni bawk a ni. National Vector Borne Diseases (NVBD) Control programme hnuaia hmalaknaah Malaria Positive panga hmuhchhuah a ni a. AVI (Annual Parasite Incidence) chu DDT kah ngai chin 2 aia hniam 0.03 anih avangin DDT kah ngailo District a ni bawk a ni. RSBY hamthatna dawng mi 761 te hnenah cashless transaction hmangin re-imbursement pekchhuah a ni a. District Hospital-a hman tur Generator lian lei niin Hospital hnawm halna tur Incinerator nei leh tura hmalak mek a ni bawk.
Government Champhai College-a department tinah Smart Class Room siam vek tura hnathawh mek niin Science leh Geography Department-ah siam fel tawh niin department dangah pawh siam vek tum a ni. Heng bakah hian Mentor- Mentee programme kalpui niin hemi hmang hian zirtirtu 52 te enkawlna hnuaiah zirlai 650 te sem zai a ni a, uluk takin mentor-te kaihhruaina hnuaiah zirlaite enkawlna neih thin a ni. DIET Champhai hmalaknain NIOS hnuaiah private school-a zirtirtu zawng zawngte kum 2019 thlenga train hman vek tura hmalak mek niin, Champhai District chhungah Study Centre 9 a awm mek a ni.
AH& Vety Department hnuaiah Live Animal Market, Champhai Ruantlangah sak tura hmalak mek niin NABARD bul tum project hi cheng nuai 260.839 senna tur a ni. Ministry of Women and Child Deveolpment hnuaia Pradhan Mantri Matritva Vandana Yojana (PMMVY) kaltlangin ICDS-in nu nau vawikhatna neite hnenah cheng 5000 a pe thin a ni.
Prime Minister’s Awards for Excellence in Public Administration hnuaiah kumin bikah hian Scheme pali; Pradhan Mantri Fasal Bima Yojana (PMFBY), Pradhan Mantri Awas Yojana (PMAY) Urban and Rural, Promoting Digital Payments leh Deen Dayal Upadhyaya Grameen Kaushalya Yojana (DDU-GKY)-ah te District thawktha inelna buatsaih a ni a. Kumin hian a hmanna pui ber New Delhi-ah Category hrang hranga District tithate hnenah lawmmante sem chhuah a ni leh dawn a ni.Nikum khan Siaha District chuan North East leh Hill States Category bika inelnaah Pradhan Mantri Krishi Sinchayee Yojana (PMKSY) an thawh that avangin he lawmman trophy, scroll leh pawisa fai cheng nuai 10 keng tel hi an lo zuk dawng tawh a ni. Mizoram atanga he award dawng hmasa ber leh awm chhun District an la ni rih a ni.
Civil Services Day hi Mizoramah kum 2016 atanga hman tan a ni a. Ram puma hman hmasakna ber chu kum 2006 khan New Delhi-a, Vigyan Bhawan-ah hman a ni a. India ramin zalenna a neih hnua Home Minister hmasa ber Sardar Vallabhbhai Patela’n Administrative Services Officer, probationers-te puala Metcalf House, Delhi-a kum 1947 April Ni 21-a a thusawi pualin mipuite rawngbawl tura inhlanthar lehna atan he ni hi hman thin a ni.
