Mizoram sumdawnna hmunpui a nih theih nana khawvel hmun hrang hranga sumdawng liante leh Sawrkar hotute nena Mizorama hmalak theih dan tur sawiho tura intawhkhawmna, Magnetic Mizoram Investors Summit chu a vawikhatna atan vawiin khan Berawtlang Tourism Convention Centre-ah neih a ni. He Summit hi Chief Minister Pu Lal Thanhawla chuan khuallian niin a hawng a, ni hnih chhung awh tur niin a hawnna inkhawmah hian Home Minister Pu R. Lalzirliana, Finance Minister Pu Lalsawta leh Commerce and Industry Minister Pu H. Rohluna te an tel a ni.

Chief Minister chuan Magnetic Mizoram Investors Summit hmasa ber neih a ni chu lawmawm a tih thu leh, Summit hlawhtlinna chuan Mizoram mai nilo Investor-te tan hamthatna a thlen dawn avangin a chhimtu India chhung leh ram pawn atanga lo kalte nena thawhhona nghet tak a thlen a beisei thu a sawi. Chief Minister chuan India Hmarchhak state zingah pawh a kil bera awm Mizoram chu hun rei tak chhung khawvel in hmelhriat lovin, chung avang chuan hmasawnna pawh duh angin a chak theih loh thin thu a sawi a: Magnetic Mizoram hmang hian sawrkarin khawvel hriatah Mizoram chu a pho chhuak a, mithiam lokalte nena panel discussion bakah hmaichhana B2G (Business to Government) leh B2B (business to Business) inkawmna neih tur atangin thawhhona leh hmasawnna tur thil thar hmuhchhuah a beisei thu a sawi. Chief Minister chuan Tourism, Power, Food Processing, Handicrafts leh Bioresource bakah Sector hrang hrangah Investor-te tan hmalakna tha tak tak tur Mizoramin a neih thu a sawi a. Mizoram economy chuan tun hnaiah hma a sawn nasat thu te, state te 12 zinga thang chak ber a nih thu leh GSDP 8% aia sang awm chhun state pali zing ami a nih thu te tarlangin, Myanmar leh India insumdawntawnna liantham nei turin sawrkar laipuiin hma a lak meknaah Mizoram chu Myanmar mai bakah Asia chhim chhak ramte tan luhka pawimawh tak a nih tur thu leh, chung avang chuan inkalpawhna tha zawk a awm theih nana rel kawng leh thlawhna tum hmun thar thlenga buaipui mek a nih thu a sawi a. Mizoramin “investment potential” a neihte chu palai ten zirchiang a, Summit chuan rah tha a chhuah a duhsak thu Chief Minister chuan a sawi a ni.

Khualzahawm Finance Minister Pu Lalsawta chuan sumdawnna khawvelah Mizoramin bung thar a kai a tih theih a ni tiin, Mizoramin malsawmna hrang hrang a dawn - sik leh sa nuam tak te, ram muanawm leh ziak leh chhiar thiam tamna state a nihna te chu hmasawnna tichaktu leh pawnlam investor-te tan pawh Mizorama hma lak tichakawmtu a nih theih thu a sawi a. Tuna agriculture leh a kaihhnawih hmalakna bakah education, health leh power lamah investor-te tan hlawhtling taka bu khuar theihna Mizoramin a neih thu a sawi bawk.

Magnetic Mizoram Investors Summit tel tura sawm zingah Ministry of DoNER Secretary Pu Naveen Verma leh Ministry of External Affairs atangin Pu MLK Raja, OSD (States) ten thu an sawi bawk a. Mizoram chuan kawng hrang hranga hmasawnna tur theihna, potential tha tak a neih thu leh chung chu state hmasawnna atana hman tangkai thiam pawimawh an tih thu te, an Ministry theuh hnuaia hmalakna tur Scheme leh Fund hrang hrang awmte sawiin, Investors Summit chuan rah tha a chhuah ngei an beisei thu an sawi a ni.

Chief Minister hian E-Gov Magazine Special Issue chu Summit hawnna inkhawmah hian a tlangzarh nghal a. Dr. C. Vanlalramsanga, Planning Secretary leh Magnetic Mizoram Summit CEO Capt. Rahul Bali ten sawihawnna leh kalkhawmte lawmna neiin, he Summit neih chhunga Key Speaker turte leh sawm bikte hnenah Chief Minister chuan chawimawina a hlan bawk. Summit-hi Jitendra Kumar, Adviser NITI Aayog, Dr. Michael Feiner, Consul-General Germany, Dr. Mikhail Gusav, Dy. Consul-General, Russia, Dhiraj Pratap, CEO, Cloudsteer Technology Singapore, Dr. Tomasz Gerlach, Director, Polish Institute, Anurita Jha, Actor& Filmmaker, Shahnab Alam, Filmmaker, Nivedita Mehra, Managing Director, US-India Strategic Partnership Forum, Raveendra Desai, CEO Airtel te bakah mi pawimawh leh mithiam thahnem tak ten an chhim a ni.

Magnetic Mizoram Investors Summit neih chhung hian Mizoram in hma a sawn theihna turin sector hrang hranga Mizoram dinhmun leh hmasawn tura a theihna haichhuah dan tur zirchian a ni dawn a, chung zingah chuan Infrastructure, Information Technology, Education, Skill & Entrepreneurship Development, Creative Industry, Films, Music, Fashion, Sports, Tourism, Art & Culture lam thlurbing a ni. Investor lo kalte leh Mizo sumdawng/ entrepreneur-te inkara thawhho theih dan tur hmaichhana sawina hmun remchang buatsaih a ni a. Sawrkar department eng emawzahin stall an siam bawk.

Investors Summit Aizawla nghah a nih hma hian ramdang a cheng ten Mizoram an hmelhriat theih nan India ram khawpui lian pathum - Mumbai, Delhi leh Kolkata-ah te Road Show hlawhtling taka buatsaih a ni tawh a ni. MAGNETIC MIZORAM thlawptu organisation lian hrang hrang, heng - State Bank of India, Bharti Airtel, NDTV Goodtimes, India Post, ICFAI University te bakah thawhpui IIM Kolkata, Mizoram I&PR Department, Leading Edge, US-India Strategic Partnership Forum,  ZONET leh MEDMOC te an ni.